basaLAPPUNG

Pekhkhos layin lessom, mahawa layin tapay

2010-11-25T18:11:00.000-08:00

Khisok juga Samsul lapah mid Kota Metro, kik say khadu-khadu Ya singgah disan ulih kamanoman, kidang pissan hijjo lapahni mid Metro haga bubat.
Lattakhan mak ngeddok puwakhi ataw kennalan, mulani Ya minok di Hotel, sabennokhni khangni Samsul no minok, makkung da tanggom kik haga ticawako Hotel, ulih kik Hotel sa mak-makni kelas "Melati" kidang Hotel say hijjo lagi kelas Penginapan/Losmen, sumang jak isan moneh, Hotel say hijjo kaliyaan kaluh ulih kukhang andan, khik ni moneh tukhuh kak pang labung.
Halok Hotel say hijjo kelasni lagi "Hotel kelas Kumbang khaddak", ha..ha..ha..

Di Hotel Samsul tungga Harjo, khagah Lombok NTB.

"Api lapah mu mid Metro jo ?" Samsul nanya.

"Nyak ngakhuwang anak ku, Ya kuliyah di UNILA lagi semester satu" timbalni Harjo.

"Niku di Lombok, kidang anak mu di Lappung, khappa cakhitani ?" Samsul penasaran.

"Sabennokhni nyak jo lahekh di Purbolinggo Lappung Timur",

"Tukhun Nyak wad anak khuwa, Nyak siang jak babbay ku, laju nyak merantaw mid Lombok" timbalni Harjo.

"Niku kidah, api sanghajamu mid dija" Harjo nanya .

"Nyak jo haga bubat, badan mak takhu salah khasa" timbalni Samsul.

"Na kik Nyak, Nyak mak haga nganik ubat, ubatno khacun",

"Temmon do ya nangiko haban, kidang bagian badan kham say bakhih di khacunni",

"Nyak jo 'menerapkan pola hidup sehat' Nyak peddom mak makhellom ga, pagi hayu Nyak minjak",

"Nyak wad Cafe di Lombok, nagun hinno usaha ku tanno" ujay ni Harjo kejjung baccong.

makkung kasipak Samsul nimbal, Harjo khadu tapok nyambung pubalahan.

"Nyak wad papikha karyawan say kakhajja di Cafe ku, kidang nyak mak haga kik santai-santai",

"Kakala Nyak nulung babasuhan, ngandan taman, yu khappa cakhani nyin Nyak sattokh wad guwayan" awaq ni Harjo.

Samsul khadu salah senggil, Ya mak dapok nimbal lagi, mak guway ni kattu conggok nga iyu ko awaq ni Harjo-no jinna.

Hani hatini Samsul, jamma hijjo temmon-temmon do pandai ngandan "kesehatan", mak say dikanik ni kattu gagulayan khik buwah-buwahan, daging Kambing Ya mak nganik ulih lamon Kolesterol hani, daging Manuk Ya mak nganik ulih lamon lemmakni, khanno pay awaq ni Harjo di Samsul.

Khani nangun khadu manom, haga labung moneh, hawani bumi Metro dibbi hinno khatong ngison, katutuq suwa angin.

Samsul payah linguk, kicik angon ni, umbaw ni apiddo say mapapekhkhos no, hak jak jinna payah Nyak nahan ngengngas andahni, khibokni Samsul.

Buttak angon, Samsul ngahata ko ikhung ni haguk Harjo say mejjong di batang ni angin, na mak bakhih lagi, khatti ni umbaw Mu no say nyani Nyak haga mabuk, mahawa goggoh tapay, pekhkhos nyengngak lebbih-lebbih jak lessom, hani hati ni Samsul.

Babah so 'menerapkan pola hidup sehat' lapah middipayyani cakak kapal hambokh,
kidang induh khadu pikha khani ano mak mandi, mula jamma say banjakh ya haga mabuk.

Pekhkhos baccong..... layin a-umbawan .......

tabik Pun ...

2010-02-13T23:59:00.001-08:00

menara sigokh tiliyak jak haguk matakhani mati (sisi barat)

basaLAPPUNG Blog, khang sikam ngaluwah ko segala KAWATEKHAN di budaya LAPPUNG khususni BAHASA LAPPUNG, induh ya dialeg A ataw dialeg O, mak say panjak di MATA kattu ya haga LEBBON, fakta ngabukti ko bahwa lamon ni SANAK mak panday bubasa LAPPUNG say jadi PAKKAL_PUKUK ni.

Jadi butulak jak masalah hinno, sikam ngakilu jama sa-unyin ni PUWAKHI say ngeddok anak LUNIK_ na, ti tawway moneh sanak khamik no cawa LAPPUNG, kippak kham hukhik nyellang.

PAK HUMA PAK SAPU
PAK JAMMA PAK SAMAPU

Nangun khanno hadat ni, mak ngeddok jamma say magoggoh, sumang Jamma sumang panakay, sumang hulu sumang pangkhatti, kidang kippak ya khayya, tattu da hunjak tebbong ni kik kham sa-iwak di guwayan, ngakhana kik wad say lupa.

lawok khajuh way bakhak
tahanyut laju mati
saluwang nekhkhak humbak
khanno pay umpamani

lebbon mawad kasiwan
mati mak ngahalinu
mak guna ni sossolan
buhiwang tukhun khadu

guwaYBettik

--------------------

Wad dillom Hati

2010-02-13T20:18:00.000-08:00

Papikha waktu say likud nyak nonton tvriLappung, kabennokhan acarani ngapubalah seni khik budaya, disan wad khuwa "nara sumber"(dapok mak ti ucak ko gellakhni sapa, kabennokhan khadu lupa moneh), mawad kik hak nyak ngaliyak jak awwal acara, sumang jak hinno moneh sinyal ni tvriLappung waktu siya kukhang hellaw.

Bumacam say di ujayko tiyan khuwa dinana, mulay jak ukhusan Festival budaya tingkat Kabupaten/Kota, say jak tahun mid tahun acarani khanno-khanno khayya, togok di menara Sigokh say makkung maksimal pemanfaatan ni.

Talipang pay cutik di menara Sigokh(siger), akhir Desember 2009 nyak ngajaq khik midokh disan, sabennokhni khadu saka nyomokh haga ngaliyak langsung menara Sigokh no, kidang appay kasipak.

Ngakhasa hanjak nyak tukhun jak jawoh ngaliyak pucuqni menara Sigkh so, hunjak lagi tukhun sappay di Lawang kukhi(gerbang) ni, disan wad Post khang laporan setiap kuwakhi(tamu) say khatong, niyat ku haga khaggoh jak motor ulih disan wad tulisan "tamu harap lapor" kidang makkung kasipak khaggoh, kuliyak petugas ni khatong ngeddi sikam khuwa, tukhun Ya khadu kheddik nyak menna nagu;

"mau ke menara Siger Pak" haku, makhi timbalni

"tolong partisipasinya Pak" hani,

kippak Iya mak cawa ngilu duit, lebih kukhang nyak dapok nedduh bahwa maksudni yaddoda tiket kukhuk.

"berapa" haku,

"lima ribu saja" timbalni.

Khadu nyak jak ngenni ko duitno, cawani;

"motornya bawa saja ke atas", makhi kutimbal;

"makasih Pak",

Petugasni waya, mak ngeddok wada kik ukhusan penyambutan Tamu.
Laju sikam khuwa cakak mid di tangabbah ni Menara so.

Sappay diya khamik baccong, kuliyak wad papikha Bus khik kendaraan bakhih termasuk motor.

Khadu jak markirko motor, kukhuk sikam khuwa nuju di bagiyan informasi say wad disan. Buniyat haga panday wad stand api gawoh disan, malah di tajo-i tiyan(petugas bagian informasi) kawos khik pin, wad moneh cakkekh kuliyak, unyin-ni hinno tanno kagambakh menara Sigokh.

Kukhiyap disababekhkhak ni ruangan disan, mak bakhih isini kalayin jak jamma tahabu, wad mejjong wad say duliq, khayya pak hani bagiyan informasi no jinna, jamma khamikno usunganni calon Bupati Lamsel, di cawa koni gellakhni kidang khadu lupa, halok suwini calon Bupatino, nyin Pakhwatin milih Iya.

"kok belum ada stand-stand nya ya" nyak nyuba nanya,

"nggak ada Pak, tepatnya belum" timbalni tiyan.

Mak benni sikam khuwa di ya, laju sikam tukhun middi "pelataran pentas", disan sikam ngaliyak sanak pulimban-limban cakak kuda, kah hinnoddo say tilaliyak disan selayin jak pemandangan alam say wad di sekeliling ni menara no.

Na tamadan menara Sigokhno kik mak gelluk ti "berdayako", hanjak kidang mak hanjak midokh disan kik khanno-khanno khayya, bacak gelluk ti maksimal ko penggunaan ni, dang sappay "gaung" ni menara Sigokh say khadu togok dipa-ipa no mak sesuway jama kenyataan.

Wad say ngagalang di angonku, kik nangun kukhuk di lokasi menara sigokhno bayakh, halok hunjak hellawni kik unggal Tamu say khatong disan meggung bukti khayya kinjuk lembaran tiket/karcis. Hakhapan ni nyin matilah, wad data say akurat, pikha pengunjung say khatong lom sebulan, malahan lom setahun, sumang jak isan moneh kik menara sigokh tertib data, lunik kemungkinan ni haga wad penyimpangan di ukhusan duit(korupsi).

Moloh di tvriLappung jinna, munggak meddoh, pulimban-limban nara sumber khuwa no jinna nimbal api say di tanya ko pembawa acarani, wad say, ngebba nyak mak nihan setuju jama ungkapan ni Tiyan khuwa, say lebih kukhang bahwa "kampung halaman itu ada di dalam hati" ungkapan hinno jinna layin moneh hak murni jak "perenungan" ni tiyan khuwa "melainkan" mengutip/ngakuk jak buku tulisan ni Jamma barat(khanno hani Tiyan khuwa dinana) kik nyak mak faham Judul khik sapa Penulisni.

Jadi maksudni Tiyan khuwa; mak pakhallu kham mekkik-makayung ngayun, ngahimbaw khik ngajak Jamma(Lappung) jo, khappa cakhani haga peduli/berpartisipasi/ikut serta/mengupayakan "pelestarian" budaya kham(Lappung) nyin ya dang lebbon, ulih pendapatni Tiyan khuwa(ngutip jak Jamma barat no jinna) asing lamon ni budaya bakhih say ti halu kham di lambung bumi jo, kham mak haga lupa(pagun mulang) di budaya kham tanggalan.

Khasani manusiawi baccong kik kham mak lupa di budaya kham nanggalan, kidang cukup kodo khasa bangga di budaya no jinna, kah hattak lom hati. Hak ulih kham ngakhasa yakin bahwa budaya kham wad lom hati, makhi kham mak ngaguway ko api-api.

Cuba ti renungko kham pay, tanno kham panday cawa Lappung, ulih jak lunik di tawway hulun Tuha kham cawa Lappung, ti tambah moneh kham balaq di Pekkon say sekhani-khani ni bubasa Lappung, cuba bandingko pay jama anak ni Jamma Lappung say lahekh khik balaq di kota, say jak lunik togok tuha mak panday cawa Lappung, Tiyan manusia moneh, Tiyan wad hati moneh, secara otomatis Tiyan goggoh jama say bakhih "nyippon kampung halaman dillom hati" moneh, kah bidani "kampung halaman" say di kenang tiyan mak "bubasa Lappung", padahal bahasa Lappung hinno say jadi penanda, lestari mawad ni budaya Lappung jo. Kik khanno kikhani, budaya hippa pay, say haga di lestari kon Tiyan.

GAYAW MESSAK

2009-10-10T08:59:00.000-07:00

Kutottong anjak tebbing
Bakhis goh jakhi kekhkha
Bettong nganik say kuning
Khusiya kham dinana

Lamon bulapis-lapis
Kik tikulik batang ni
Kak tengngan ni ya nimbis
Khukkak mak ukhung lagi

Batang tuwoh biding way
Wad moneh say dillom las
Lagi kumbang ya ngaway
Balaq sakhungni tikkas

Bulat layin kakhikkil
Isini lamon nihan
Dang lupa ya tisissil
Mak khawan kham lollonan

BUWAH SALAK

2009-10-10T08:45:00.000-07:00

Khakhebboh batang tuwoh
Nyukkak kham liyu diya
Batangni taji gawoh
Hakhiko nyucuk mata

Sungguk kham putatinuk
Ngakhuwang dalih ninday
Sayuk takuk ya busuk
Kik mak dihenna Tupay

Wad khuwa sappay tellu
Bilangan kamukhakni
kekhkhasni khappa batu
khuppung ipon andahni

Hennak ngabulup buwah
Halom bulat tuppahni
Kellot say lagi matah
Say khatuh hunjak lagi

talluy BULAT

2009-05-24T09:04:00.001-07:00

Mulang jak sakula, makkung kuk kasipak mejjong, Siti khadu dikayun Emmak ni ningguk apuy.

"Haga api la Mak" tanyani.

"Na-jo da, Bak mu nyitta talluy gukhing bulat" Makni Siti nimbal jak lapang tengah.

Khadu wad tellu khani hijjo Bakni Siti mak bangik badan, panas ngison khik sakik hulu, khappa tikayun mengngan mak dinggokni, payah haga kukhuk hani.

Sakattini Bakni makhuyuh, Makni Siti haga mak dapok nguyunko guwayan bakhih, mak guwayni kattu ngapapicit huluni Bapak nanakni, mula wadni Ya ngayun Siti ngagukhing talluy no.

Di dapukh, Siti ngasasebbu apuy nyin gelluk balaq, iyuk mak tikkas jak culukni, ya apuy khadu balaq laju Ya manggung ko kaccah datas tukku, makhi nuwangko minyak kalapa jak lom gudu, tekhus Ya ngakuk talluy manuk jak lom sakkak.

Dillom, dilapang tengah Hulun Tuhani siti ngapapennah, api lagi Bakni, hani hatini kalaw pay nyakjo bangik mengan, kik suwa talluy bulat no hani.

Kidang mak benni jak isan,

"Tuuum" wad bunyi ngadettum jak dapukh.

"Bunyinapi ano Siti" Makni Siti mekkik jak lom.

"Ano talluyso moneh Mak" Siti nimbal jak dapukh.

Makni Siti minjak ngaliyakko mulli lunikni say lagi kellas tellu SD no di dapukh.
Tukhun sappay di dapukh mati balaq kanjatni ngaliyak talluy khik bawakni khadu khawang benna.

Lom hatini makni butatanya,

"Yakhappa la hamu ngagukhing talluyno, mula kuk bawakni khawang khanno" hani Makni.

"Ano hamula tigukhing bulatko" Siti nimbal kakhabayan.

"Say hakuso talluy mata sapi, layin hak kuk bawak-bawakni tigukhing, kammakni ngadettum, khawan mak kenna pudakmu" khibokni Makni.

induh kidah Siti..........

SABAY KUYA

2009-05-15T21:23:00.000-07:00

Kisahni Sabay Kuya atau wawakhahan say bakhih, biasani dicakhitakon Jamma Tuha diwaktu haga peddom, dalih ngayid-ayid, ngababekkom culuk cukud, togok di ngilik-ilik badan, na hak khadu makhanginda kaban-ni sanak so.
Wawakhahan selalu dipapennah sanak dijaman saka, ulih dinana makkung wad sarana hiburan khayya kinjuk TV, Game ataw say bakhihni.

Ajoya kisahni

Asuq dikhimba khakkos dillom pullan tuha, wad Kuya muinday jama Bekhuk, mak bakhih say ngabatangko tiyan khua sabetti-an, yaddoda ulih khisok putungga.
Kalapahni Kuya say isud-isud jawoh bubida jama Bekhuk say makellakh, luccak middija dudi, kakala Ya datas kayu, wad tattangni Ya khaggoh nyeppok kani-an ataw middi way nginum.
Teggi khani musim kamakhaw, Bekhuk ngaban tukhun nginum di way, mawad hak nginum khayya, wad say tuppak sellom, lamon moneh say bagukhaw dibiding way khik datas batu.
Manom khani kaban-ni Bekhuk no jinna sahahenna-an moloh cakak datas batang, bugayud nattay pappang, jak batang say middi batang say bakhih, laju kukhuk lom tengah khimba.
Di way khangni tiyan ngimum jinna khadu moloh hiyon, tinggal cakhaccahni way say kagahasa. Mak jawoh jak isan, munggak cutik, wad anakni Bekhuk lagi sanemmon mayin way, mawadda hak dihakhi koni, kik Ya no takacekh jak say khamik.
Sebbik hatini bakhong Ya ngakhilong meddoh, Ina Bapakni khik say bakhih khadu mak lagi disan.
Cungak khilong Ya cakak jak way, mepekh dihantakhani batu,ngison khik khabay pangkhasani.
Khani khadu kellom, hani hatini, dipa pay do Inaku jinna.
Busuya suwa khabay katutuk jak jawoh Ya nengngis gahasani Kucing pullan, haga mati do nyak jo hani.
Bettoh api kalagi, takellay bugayud di Ina, bang tanno tinggal nanggalan. Haga cakak batang say balaq mak dapok, Ya makkung panday. Induh khadu pikha kali Ya takusukh, ngahahakkod batang mak juga mingan, kalemmohan laju nganyap dihantakhani banekh.
Kammak ni la Bekhuk anak, makkung dihaluni haga nyeppok batang say malunik.

Bekhuk lunik no jinna gellakhni Ambin.

Pagi khani goh ayukni, mata khani mulay nyakhaccang, bukhung pattun satimbal-timbalan, khanno moneh pappang ni kayu, bukellay disasebbu angin.
Ambin minjak jak balik banekh, bettoh mak katahan, kidang mak jawoh jak isan wad batang hakha. Ambin lapah middiya ngodok hakha messak tikhahni kakebbang jinna bingi, khadu jak siya, molohya nutuq luyudni nambi tukhun middi way, pagun Ya cungak khilong ngakhakhiyap Inani.
Sappay di way Ya nginum, khadu Ya mameddohan nattay biding way.
Khadu seddong jawoh lapahni, takhuppat laju takhu, Ambin ngaliyak wad batu ngalammaw ditengah way, tikabenni takakheddik di Ya, khituk hinggani ngapapenyin ko batu ngalammaw no jinna.
Ambin ngakheddik, Ya haga nilah koni, api pay do say wad di haya-an ni no.
Api kalagi, sangun lagi ngalagok, tambah takebba mayani, api mula wad batu, kahulu khik kacukud.

Lugahni Bekhuk anak, Ya makkung panday hengngani alam wawwah jo, Kuya khadu haga bekhak tapi, mak dapok di inong ni, api kagellakhni ano hani.

"Api guway mu Bekhuk lunik, mula niku ngahaman dija" Kuya balaqno jinna menna nagu. Kimod gellakhni Kuya hinno.

"Nyak nyeppo-i Inaku, nambi nyak di tinggal koni di way jo" timbalni Ambin.

"Ditinggal koni khappa, mak ngeddok Ina say mak kahud di anak, katubbang niku nambi ngajawoh jak say khamik mula niku mak di liyakni, ya tan bugaggan mulang niku mak di dipa tiyan" timbal balosni Kimod.

"Sapa Niku la, dipa khang Mu takhu" Ambin ngababani ko hatini nagu Kimod.

"Nyak panunggu way jo,dipa wad hiliyan ni way, seggok nyak dibbah batu" timbalni Kimod.

Ambin khituk ngakhettiko cawani Kimod, kicik angon-ni, mak ngison kodo seggok dibbah batu.

"Nyak nutuq niku gawoh yu, nyak mak panday khang ni lamban ku" pangatuni Ambin.

Kimod ngahaman, benni juga Ya mak nimbal,haga nutuq nyak khappa, panday languy mawad, hak haga nutuq nyak sellom bah batu, angon ni Kimod.

"Na, mak dapok moneh kik niku haga nutuk nyak, khang mu so datas batang" ujay ni kimod.

Kattini ditinggalko kaban-ni nambi, mawad Ya putungga sapa-sapa, mula pas Ya tungga Kimod, Ambin ngangiyok haga nutuk Kimod.

"Na khadu kidah kik niku pagun nyassang, ija niku cakak ditundunku jo" ukhawni Kimod.

Buttak cakhita, Ambin diungayko Kimod juga, satemmon-ni lom hatini Kimod ngakhasa peddih ngaliyak bekhuk annak hinno, cungak khilong nyeppok Ina khik kaban-ni say ninggalko Ya.
Ambin cakak ditundun-ni Kimod, kidang khappa Kimod haga languy, Ambin takusukh jak tundun-ni Kimod, khanno juga sappay moloh-moloh.

Khadu buminggu Ambin pujama Kimod, Ambin mulay takellay camakkod ditundun-ni Kimod, Kimod bettik hati katutuq nalom ngababang, Ambin khisok diajaqni languy khik mamayinan di way, Ambin mak lagi ngakhasa mangi, kak wad kani-an tiyan khuwa hawo-an, kapan mak saliya-an, na tapok saukhaw-ukhawan.

Jak khani mid minggu, minggu mid bulan, khanno khadu benni ni tiyan khuwa pujama, macam-macam hingga khik tikkah ni tiyan khuwa, bugukhaw lalang waya, wad tattangni sawada-wada-an, na hak khigu moneh, makhi sabetti-an luwod.

Mak tikhakhasa Ambin khadu balaq, Ambin tanno khadu makhanay, mak lagi ya ngingokko Inani, Ya khadu lupa di umbaw khik di khupa ni kaban-ni dinana.

Musim kamakhaw tahun hijjo hunjak sassakni jak kamakhaw khuwa tahun say likud, waktu Ambin putungga Kimod dinana. Tanno kamakhaw bani, kani-an mulay payah seppo-an ni, kayu lamon ngaliyang ulih khadu saka mak kenna labung.
Ambin tukhun jak atas batang, Ya ngayung-kayung ngukhaw Kimod, Kimod lagi basani malaway.

"Sabay, sabay Kuya, dipa niku" Ambin nyeppok dalih ngukhaw khikni, say mak bakhih yaddoda kuya balaq say gellakhni Kimod so.
Ulih khadu sahaluwan khik katti ni tiyan khuwa putungga, makkung wad siyang, mulani-wad tiyan khuwa no goggoh jamma musabay, khanno da sakking bettik ni.

"Khappa, wad juga kodo lawayan so" taguni Ambin.

"Na mawad sabay, jak jinna makkung juga ngahalu" timbalni Kimod.

"Ajo nyak ngusung buwah cangkuwang, cakak niku, kik lawayan kalalah, lapah kham tandang gawoh" ajakni Ambin.

Kimod cakak jak way, hanjak hatini nakhima buwah cangkuwang tangusungni Ambin, kidang gellakhni la bekhuk, kippak khadu jak nganik, pagun juga Ambin ngagaga bagiyan-ni Kimod.

"Haga tandang dipa pay kham khuwa" tanyani Kimod di Ambin.

"Lapah kham nattay way jo meddoh, nyak jinna mak sanghaja nengis Patak halom hulu Pattun" timbalni Ambin.

"Ya api moneh say khadu di pattun ko Patak halom hulu no" Kimod ngalagok.

"Makkung moneh matilah, kidang kik pangkhattiyan ku, tiyan khuwa matunang lagi wad saseggo-an" hani Ambin.

Ambin ngahaman sakhabbok, payah Ya ngingok-ingokko pattun-ni Patak no jinna, mak benni jak siya Ambin muttal kahanja-an khik ya cawa,

"Na, kuingok ko tanno" makhi Ambin tapok pattun nawak bunyi ni Patak jinna, khajjo pattun-ni:

Kutottong anjak tebbing
bakhis goh jakhi kekhkha
bettong nganik say kuning
khusia kham dinana

Lamon bulapis-lapis
Kik tikulik batang ni
Kak tengngan ni ya nimbis
Khukkak mak ukhung lagi

Batang tuwoh biding way
Wad moneh say dillom Las
lagi kumbang ya ngaway
balaq sakhungni tikkas

Bulat layin kakhikkil
isini lamon nihan
dang lupa ya tisissil
mak khawan kham lollonan

"Na, khanno da Sabay pattun-ni Patak so jinna, khappa kik hamu Sabay, buwahni api pay say jadi saseggo-an-ni Patak khuwa matunang no" Ambin bukoddo di Kimod.

"o..o..buwahni apiddo, ano" mak kejjungga timbalni Kimod, kattu ya khadu tapok podokh hulu ngatatedduh pattun ni Patak no kakhu.

Satottong-tottongan tiyan khuwa musabay, makkung dapok di tedduh tiyan khuwa khusiya ni Patak halom hulu tukang pattun-no jinna.

Tiyan khuwa muinday, Ambin jama Kimod, minjak jak khang ni-tan mejjong jinna, makhi lapah nutuq hiliyan-ni way meddoh.

Laju mameddohan, lapah dalih bubabah, cungak khilong tiyan khuwa ngapapenyin ko khicci-macamni say tuwoh biding way no, hippa wad say makuning cutik tapok tiyan khuwa putatinday. Sappay diddoh Kimod ngalagok, kicik hamma-ni, mati wawwah pay dunia dija-jo, hani. Kippak hunjak tuha Ya jak Ambin, khupani Kimod makkung wad lapah jawoh nattay way no meddoh. Sumang jak isud-isud lapahni kik didakhak, batu diway no pubalaq-balaq, payah Ya nyellak ko badan dihiliyan-ni way tulung, khang ni languy mak mabekhak, mula paidokhan-ni mak majawoh.

Khanno jawohni lapah, khik khadu sanemmon putatinday, makkung juga tiyan khuwa ngahalu api say di pattun ko Patak jinna.

Di kikhi kanan-ni way mak lagi ngaliyak batang kayu say balaq, mak bakhih say panjak kalayin jak kheppong gayaw khik khakh-khah kayu cambay.

Mawadda tiyan khuwa panday hak kheppong gayaw bekhak no khadu kheddik jak khang ni Jamma budakhak, nuwakh ngusi nyani khang butatanoman ya tanohni mulay ngagalih, ti tinggal ko, titaganko limuk, attan-ni kik khadu hellau luwod tiyan moloh disan kippak mennah butahun ben-ni ni. Samakkungni moloh khang saka no, tiyan ngabukak dakhak sumang say tanohni lagi buyun, mulani dunia disan khadu kaliyaan pangga.

Ambin jama Kimod buindom mejjong bah khuppun gayaw, makkung bettik habuni, tiyan khuwa dikanjat ko bunyini batang khukkak.

"Bunyinapi ano Sabay" siyah ni Ambin di Kimod.

"Induh, kattu cakak pay niku di batang gayawno " hani Kimod.

Ambin cakak di batang gayaw, kidang kukhang langgakh Ya mak dapok ngaliyak api-api, makhi Ya luccak mid batang kadundung pullan say ninggam batang gayaw khangni jinna. Jak jawoh Ya ngaliyak wad Liman nunggal lagi sanemmon ngambuk-ambukko batang gayaw say di hak unggak, induh ngulam induh Ya ngamuq, makkung kapandayan, kattu Ambin bugaggan tukhun ngeddi Kimod.

Ambin appay mejjong banjakh Kimod, hak makking Liman balaq jinna, mak benni jak siya, ngagukhuh bunyini, bang kikhani kaban-ni khatong ngeddi Liman nunggal jinna, magingguk alam kapellok, kuccak lattak api say daladni.

"Bacak kita khuwa malih jak ija jo" hani Kimod.

"Niku bangik, dapok luccak datas batang, kik nyak dilik ko tiyan, na tuppak khicit" cawa laju ni Kimod.

Mawad timbalni Ambin, kattu tiyan khuwa bugaggan malih jak iya, mepekh tan khuwa nattay biding tulung no jinna.

Pagun seggah hatini tiyan khuwa muinday ulih dikanjatkan kaban-ni Liman no kakhu, Kimod haga sellom kidang mak di kenni Ambin, tattu mangi pangkhasani kik Kimod seggok bah batu lom way no.

Bulinduq baling batu balaq, khadu asuq baccong kik hak pangkhasani tiyan khuwa, makkung moneh maben-ni tiyan khuwa seggok, kuk badan-ni Ambin lagi gagettay goggokhan, tiyan khuwa moloh takanjat nengis khakhatting patoh kenna ilik, na tapok khituk, cungak khilong tiyan khuwa, Liman jinna kodo say ngakheddik no hani Kimod.

"Api ano sabay, induh kik kabanni Liman jinna kodo say khatong no" hani Kimod.

Makkung kuk Ambin nimbal, mak di hakhiko tiyan khuwa wad Baning balaq tukhun jak hak tundun-ni tiyan khuwa no.

"Waw, mati balaq kanjatku" hani Kimod.

"Niku khattini say lapah di hak isan-no jinna" cawa lajuni Kimod.

Kimod panday di Baning no kakhu, tiyan nangun dapok sainongan, khik nangun tiyan lagi muakhi, kahni Kuya hukhik di way, makhi Baning hukhik didakhak.

Talipang pay cakhita, seddong sakani Baning mak tungga Kimod, ngalagok ya ngaliyak puwakhini, kasaka moneh Kuya nginday ko Bekhuk, hani hatini.

"Acak niku dija, biasani lapah mu mak majawoh" taguni Baning si Kuya dakhak no.

"Na kejjung pay cakhitani mula sikam khuwa jo togok dija" timbalni Kimod.

"Layin pay, ija pay niku" Baning no jinna ngukhaw Kimod.

Kimod khatong ngakheddik di Baning, jawoh juga khang ni tiyan khuwa ngicik, katutuk cawa hamma, mula Ambin mak nengis api say di kicik-ko tiyan khuwa muwakhino.

Khupani baning no jinna pagun ngalagok api mula wad Bekhuk pujama Kimod.
Kimod mulay nyakhita, jak awwal mulani, jak pakhtama ya ngahalu anakni Bekhuk, buwah kuning say goggoh jakhini kekhkha, kuk tiyan khuwa seggok ulih ngaliyak kaban-ni Liman, di ujay ko Kimod jama Baning no.

Mak ben-ni tiyan khuwa bubabah, Baning nangguh di Kimod, sakhaduni ya jak nginum, tapok ya lapah cakak jak way, kidang appay pikha ngajippang ya kesekh jak ya, ngakhilong ya haguk Kimod say khadu moloh ngakheddik di Ambin, makhi ya cawa;

"Dang kutti khuwa khabay di Liman-no mawad hak tiyan nyadang, mak ngebba haga ngagayah, khik nangun kham mak sagayahan" khanno cawani Baning.

"Ya khayya kodo, nyak la khabay katubbang dilik koni" timbalni Kimod.

Mak lagi hak wad timbal balosni baning no jinna, mak lagi ya butatanya lom hati, kattu ya tapaccok potokh ngalajuko lapahani.

Khanno moneh di Ambin, ya tukhun Baning malih, gelekhan-ni say ngulih-ulih jama Kimod. Ya attan-ni Ambin khadu pappan nengis cakhitani Kimod, Kimod ngajak Ambin ngaliyak-ko buwah kuning say goggoh jakhi Kekhkha say di pattun ko Patak so jinna.

Kimod panday jak Baning, buwah kuning saseggo-an ni patak so, bang kikhani buwah ni putti gayaw, jak jinna tiyan khuwa ngaliyak, kik hak buwah ni gayaw, kidang mahujaw mula mak di pakhingoh ko tiyan khuwa.

Kammakni hujaw kik putti matah.

"Lapah tutuq nyak" Kimod ngajak Ambin.

"Mid dipa" Ambin nimbal.

"Ano babah so kham haga nyeppok seggo-an-ni Patak so, nyak khadu panday tanno" timbalni Kimod.

"Na payu kidah kik khanno do" balos ni Ambin"

Kimod khik Ambin cakak nutuq sakal, Kimod ngingokko lohotni Baning jinna, kik haga panday khangni gayaw say buwahni messak hani, tattay kutti khayya sakal dunggakno, kik ngahalu batang lissuh, disan sakal cabang khuwa, akuk say nyippang kikhi say laju cakak, dang kik ngakuk say kanan, disan khangni Babuy ngubang.
Sappay dikhang, dihalu tiyan khuwa batang ni gayaw so khadu patoh, kik mak Uccal, Babuy say jak nakhanggawni.
Buya pangkhasani Kimod cakak pumatang bang sappay diya hahanani tinggal say khik kapellok lagi, akik hinno makkung bettik messakni khik khadu di henna Putit.

"Khawan kita khuwa jo" khibokni Kimod.

"Khattini buwahni gayawno seggo-an-ni patak so, khisok ga nyak nganik lagi lunik tumbay" hani Ambin.

"Dipa kidah kawayni,"

"Dipa say goggoh jakhi Kekhkha so kidah" Ambin cawa nanggalan.

Kimod ngakhilong batang gayaw bakhih say buwahni lagi matah, di khiyapni papikha khuppun say mak jawoh jak isan, makhi ya cawa;

"Udi api say nimbul di pucuq ni gayaw di, halok huddi kawayni so" Kimod nunjukko sombong ni gayaw.

"Ya tukhun jadi buwah bawakni lekkak, kidang mak jadi buwah unyin, udi say dibbah nidi pagun ngaway" Kimod ngalagok bakhong ngaliyak tadukni.

"Buwahni bikkuk mid hak atas, kik tipenyinko goggoh jakhi naku" Kimod ngatatottong jakhini Ambin.

Mak takhu Kimod ngaji-aji buwahni gayawno, kidang ulih sanangun tuwah ni pacak, mula hak injuk dihaluni sakiman-ni Patak so jinna, sumang Jak Ambin, ngalah-ngaduh ya ulih mak kabagiyan gayaw messak no, dipa nangun khadu bettoh.

Lattakhan khasa bettoh say mak katahan, tiyan khuwa musabay bugaggan malih jak ya, laju lapah cakak mid babbu sakhakkungni pumatang lunik no.
Sappay datas, tiyan khuwa musabay ngahalu huma tittok, khupani sakeddaw dakhak hinno khadu malih jak isan. Kidang mak siyal ga, tukhun mak benni jak pukhakhiyap tiyan khuwa ngahalu batang geddang say tuwoh kheddik anjung di dakhak hinno, kabennokhan wad buwahni say messak.

Khadu sabingi kabiyan Kimod mak nungga way, khituq hinggani, pusang, dipa mahu, hahanani say jak di kanikni yaddoda geddang messak nambi manom, akik hinno makkung dapok ngalebbonko khasa mahuni.

Kimod ngagukhah Ambin say pagun camakkod peddom di batang geddangno, lagi dadokha-an sukkan baccong hinggani haga khaggoh jak ya, kidang ulih mak dapok mak, Kimod khadu lapah menna ninggalko ya.

Sappay dibbah, khadu dibiding kebbun, tiyan khuwa musabay ngahalu khanglaya ni jamma pakhulang dakhak, tinggal luyudni lagi, khanno da sakking bennini dakhak hinno mak tikhakhuwang.
Lapah tiyan khuwa musabayno nutuq luyudno jinna, laju-laju, takokkoh ngahalu way, seddong balaqni way hinno, layin lagi hak tulung, katutuq khellom moneh. Hanjak hatini Kimod tukhun nungga way, tuppak sellom ya disan, languy mak lejju-lejju.

Ambin jinna-ni makhanoq khayya dibiding way no, kidang ulih ya ngaliyak khik ni sanemmon mayin way, ya iya tukhuk moneh.

Kanemmonan bagukhaw, mawadda hak dihakhiko tiyan khuwa musabay, kik tiyan khuwano khadu di hanyutko way meddoh.

"Liyak pay sabay api gellakhni huddi" hani Ambin cawa jama Kimod.

"say hippa moneh sabay" timbalni Kimod.

"Na, huddi da say gellakhni Jamma so" Kimod ngalajuko cawani.

Ambin pu-kakalagok ngaliyak tuppahni Jamma, salama hijjo makkung wad hak pu-huk di manusia kippak pissan ya.

"Jamma" Ambin lagi ngalagok.

"Iyu, mak dingok-ko kodo, khang kita khuwa nganik geddang nambi, geddang nambi so mawad kik hak tuwoh nanggalan, mula ya tuwoh di ya, Jamma no say nanom ni disan" kejjung juga timbal ni Kimod.

"Haga api la mula Jamma no nanom geddang disan" Abin pagun ngalagok.

"Jamma bubukak disan, nuwakh-ngusi nyani khang butatanoman, macam-macam say ditanom ko tiyan, mamulani pay nanom pakhi, kik lagi basani ngisi pakhi tanoh say di bukak tiyan-no, dakhak gellakhni, kidang kik ya khadu leppas jak ngagettas, khik di tanomi-tan tatanoman bakhih, kebbun gellakhni" ujay ni Kimod kejjung baccong.

"Na, cutik lagi mak lupa, di kheddik batang geddang nambi so wad anjung, anjung no disani Jamma pakhattini tiyan buindom, khang tahabu kak lagi basani duma, kakala moneh tiyan minok disan, kik tiyan minok, gellakhni bu-umbulan, na, khappa ben-ni ni tiyan bu-umbulan disan, anjung no jinna jadi lamban-ni tiyan" sambung ni Kimod.

Ambin languy mid hak biding way, bagayud di bakak ni kakhinjing, makhi ya luccak di batu, mejjong ya disan, Kimod languy khayya nyeppok way say kakkah, ya sappay di biding, kheddik khang ni Ambin mejjong jinna, ya ngajungaw ko huluni luwah jak way.

Munggak meddoh pubalahan-ni tiyan khuwa musabay, dalih ngapapenyinko kaban-ni jamma say lagi basani duway no, wad say lagi sanemmon nottos kayu sabun pakay moppoh, wad moneh sanak mandi khik mayin way.

Mawas khani, say-say babbay malih jak pakkalan mandi, wad say nyuccun poppohan khik nguttay ko bakhunuq ngisi way, wad say nyakhaddang pakhuh, pakay ngulang ko way so.

"Sabay udi wad say lunik" ambin bukoddo di Kimod.

"Say lunik di, anak ni tiyan" timbalni Kimod.

Ambin ngahaman, lattakhan ya ngaliyak wad babbay mappam anak, wad moneh say nawid anakni mulang jak way no, khatong ingo-an ni Ambin di Inani, hatini tapok sebbik khanno khadu sakani ya mak putungga di Inani, kidang mak benni Ambin magoh, ya takanjat ulih di sakhabbu Kimod makay way, api mula ti ukhaw-ukhaw mak nimbal hani Kimod.

"Ngalagok nyak di niku sabay" hani Kimod.

"Ngalagok dapi moneh kidah sabay" Ambin nimbal.

"mak biasani niku magoh, lapah kita khuwa cakak nutuq khanglaya ni jamma mulang jak way no, sapa panday kham ngahalu kani-an" Kimod ngajak Ambin.

"Na lapah moneh" timbalni Ambin.

Lapah puikhing tiyan khuwa muinday cakak jak way, pagun nattay khanglaya pakhattini Jamma disan lapah duway.

Pekkon lunik say kah papikha ngalamban disan, pakhwatin ni hukhik anjak hasil butatanoman, sumang jak pakhi dakhak, gagulayan, kikim khik putti say ditanom ko tiyan, say jadi kani-an ni tiyan sakhani-khani, kik tiyan makhattok gulay Iwa, tiyan nangun makheddik jak way balaq, lamon macamni lawayan disan.

"Bapak, ajo way mu dija" Kimod nengis wad anakni Jamma cawa.

"Iyu, pik-ko disan khayya nak yu" Bapakni nimbal.

Jak jawoh Kimod ngaliyak sanak bakas tanggung nyakhaddang tippung ni taw kagalah, tijalin makay huwi, bettik goh anyamni, di huluni tippung pakayni way nginum no kalubang pakhatti nyossoh khik nuwang ko way,lubang ni tisulun makay kakhakhasni putti nyin ya mak takuppah.

"Api la Bapak guway mu" sanak hinno jinna nagu Bak ni.

"Ngali anakni putti, nyin titanomko kham, ija kidah niku, tulung pay Bapak ngakad anak ni putti jo" Bakni sanak hinno ngukhaw ya.

Kimod nyambang jak baling talos say mak jawoh jak khangni Jamma khuwa mu-anak no, di penyin ko Kimod, cakhani tiyan ngali togok di nanomko anak ni putti no jinna, hani hati ni Kimod, kammak ni bettik tuwohni gayaw dija jo kik wad say nanom khik say ngandan-ni, hani.

Khadu bubilang bulan Kimod jama Ambin pukheddik di gelung-gemalay ni manusia disan, mak ngeddok say bukhubah di akkon-ni tiyan khuwa, pagun goh ayukni, sahawok di kani-an, saseppok kik mak saliya-an.

Pikha khani jak isan, Kimod mulang middi pakhattini tiyan khuwa Ambin buindom, ya ngusung baha uccukni putti samulli tanghaluni jak payuyyuhan-ni jamma, di ukhawni Ambin, ija niku, ajo nyak ngahalu putti messak hani Kimod.

Ambin ngakhilong haguk Kimod, makhi ya cawa:

"Putti, ano buwahni gayaw say diusung" Ambin ngalagok.

"Kasaka dikhani so, nyak nengis Jamma cawa, gayaw dija jo gellakhni putti" timbalni Kimod.

Mawad hak kejjungga pubalahan-ni tiyan khuwa muinday, kippak lagi pupakhadda ngalagok, kattu tan khuwa so tapaccok saugay-ugay niwadko putti sang baha lunikno jinna.

Tiyan khuwa mukhkhik lagi basani nganik putti no, hak taliyu kekhkha sanga kaban, takhu jakhuni kekhkha so, khik ya cawa:

"Liyak kutti pay bekhkhuk nunggal huddi-di, ngekhkhik-ko kuya" hani kekhkha kalabay no jinna.

"Udi tiyan khuwa di, hawo-an nganik putti" hani say bakhih.

"Kik nyak, kukanik-kanik nanggalan" say bakhih moneh nimbal.

Kidang uttungni mak benni kaban-ni kekhkha so ngamamayuh Kimod khik Ambin, gimbol tiyan sahahenna-an bugayud khik luccak datas kayu, laju mid hak unggak.

Mak benni jak siya, gamunuy puikhing-ikhing caccah jak luppak way, takhu moneh tiyan tukhun ngahakhi ko Kimod khik Ambin, putatinuk tiyan jak atas batang ngapapenyinko tiyan khuwa mukhkhik.

"Wuy-wuy, layin kik huddi di bekhkhuk kodo, khappa pay pangliyak kutti" hani caccah say pakhtama ngahakhiko Ambin.

"Udi ya pujama kuya" say bakhih cawa moneh.

"Halok ya diambin ko kaban ni, mula ya nunggal disan" timbalni caccah bakhih.

Kidang khawan ni, mak benni moneh caccah khamik no jinna hak malih.

Ambin ngalagok khik butatanya lom hatini, acak nyak jo diucak ko tiyan bekhkhuk nunggal, hani. Injuk haga di utah koni luwod putti say dikanik ni jinna, talemmos badan ni, haga nahok, nahok jama sapa, laju nongokh ya bah kakhinjing no, say ngebba ni Ya busuya, Iya diucakko caccah jinna, di ambin ko kaban ni.

Lagi mak kanattuwan pangkhasani, hak magingguk pucuq ni kakhinjing khang ni buindomno, bakhong ya cungak, diliyak ni giguq sangakaban bekhkhak.
Sabennokh ni kaban ni giguq no mawad panday hak wad bekhuk dibbah kakhinjing no, Kidang ulih Ambin khadu khuwa kali diwada kekhkha khik caccah sanga kaban samakkungni, ya mak dapok lagi nahan hati, tapaccok kabaniyan ya cakak mid di pucuqni kakhinjing no, dipupuh ni giguk khamik no jinna.
Kakhabayan laju ngebbas, tabokh citakh kaban ni giguq so.
Yatukhun khadu jawoh, tukhun tiyan messon luwod, cawa jakhuni:

"Kik pangliyak ku say mupuh kham jinna no bekhuk, khappa pay pangliyak kutti" hani.

"Yu nangun bekhuk la" giguq say nimbal.

"Kidang api pay salah kham mula ya kasitanan" giguq nganak lunik cawa moneh.

Ngalagok sanga kaban, togok manom khani Giguq khamik no jinna pagun khayya butatanya mulang tiyan, apiddo ngebbani mula Bekhuk nunggalno jinna ngapapupuh tiyan.

Pagi khani Kimod mulang jak tandang, diliyakni Ambin mejjong di baling bakak ni kakhinjing, kicik angon-ni Kimod, mak mayukni ano nongokh khanno, bang injuk sakhingok.

"Sabay, api guway mu disan, ija niku ajo nyak jak ngahayu limus" Kimod menna nagu.

"Kanik-kanik niku, mak nyak ngagunako limus no mawad" timbal peggak ni Ambin.

Kimod seggah, cutik lagi mak takacay limus say di bekkomni, ulih nengis timbal ni Ambin. Api pay do guway ni ano mula hak pagi khani tuppak nahok, Kimod butatanya lom hati, khanno khadu sakani tiyan khuwa pujama, makkung wad timbalni Ambin say goggoh khanno,

"Api la guway mu, ti ukhaw bettik-bettik mula hak khanno timbalmu" Kimod tapok sakuk.

"Yapi mak dingok ko kodo cawani Kekhkha nambi, kik niku wad kani-an, kanik-kanik nanggalan, dang dihawok ko di nyak" timbalni Ambin.

"Nyak jo Bekhkhuk nunggal, mak tanggom nginday ko Niku, mak ditengis kodo cawani Caccah nambi, nyak jo khadu dittok ko hulun Tuha-Puwakhiku, mak gunamu ngapakhingoh ko nyak" timbal lajuni Ambin.

Mawad timbalni Kimod, tanno ya panday api say dikhasa ko Ambin, liyom, sakik dihak udi ni sakik, sakik mak ngidok bandingni, kik hak temmon do ya di ambin ko kaban-ni, khadu pay nunggal hukhik nanggalan, bakhong nginday ko Kuya say induh kajajinis ni, lamon hulun say mak demon.

Kimod pagun ngahaman, mawad timbalni kippak sanga patoh, niyat ni ngahayu Limus jinna haga ngahawok ko Ambin, minjak semawas Ya kattubbang di henna Jamma, bang sumang say dihaluni tukhun Ya mulang, Ambin mulay takenna di kicik tahok khik hasud ni Kekhkha khik Caccah so, nambi.

"Ajo Limus so kuppik ko say, kik niku khadu bettoh kanah akuk khayya dija" Kimod cawa jama Ambin, makhi ya laju lapah mid biding way.

Sappay diway Kimod mejjong di bah batu, tukhun Limus say dikanikni bella laju Ya sellom di way, mak tattu kik ilung ni, kattu ya haga ngalalillaw ko hatini ulih lattakhan ngaliyak hingga khik kakhiloh ni Ambin say mak bukenna di Ya.

Ambin khanno moneh, malih ya jak khang ni nongokh jinna, lalajuwan munggak nuju pullan say wad di duwakhani pekkon no, say biasani tiyan khuwa musabay mak khippak ninday kebbun putti ni jamma disan, kik mak, tandang di payuyyuhan kudan lamban, tanno bettoh mak dikhasa Ambin lagi, angon ni mak kanattuwan, dicadang ko kicik tahok ni hulun.

Lattakhan hukhik nanggalan, khasa mangi khik sebbik mak dapok ditung-ngitung ko Ambin, mak ngeddok lawan bagukhaw, mak ngeddok khik say ngunggukh Ya cawa, haga moloh nunggai Kimod Ya liyom.

Lessoh nyossoq lom dada, tahili luh mak dikhasa Ambin kapan ya tabitta di Ina ni, mati khawan bagiyan tukhun di lambung Bumi, sossol mak juga bella ngabiti badan tumban.

Kutiti jambat awi
Mayan ngukha kabellah
Khuguy hati kik nandi
Kattu patoh ditengngah

Lapah lom bingi kellom
Mak nattu haguk ilung
Say panjak badan kakhom
Khawan kik wad say nulung

Ngajippang mak tikhasa
Badan happang hayungan
Tanemmu bang khajjogga
Induh haga hakhungan

Khanno pay umpamani, hiwang ni Ambin nyossoli dikhi, ngalimak ka-ungayan kidang induh disapa, khanno khamik khik khadu lamon ni Ya putungga makhluq dilambung bumi jo, kippak say nim-mak, say haga makhingoh ko Ambin, malahan ngamamayuh khik ngalalang ko Ya.

Khappa Bekhkhuk nunggal soddo, mejjong bah batang nanggalan, kah ni tanno mak lagi cungak khilong, magoh ngahaman ngangon ko tanemmu ni di lambung bumi jo.

Khadu bella pubabanding, pagun juga ta-ulang di Kimod angon ni, mak bakhih mak sapa lagi, mak khuwa mak telluni, Kimod noddo say haga ngungay ko Ya, lawan ni bagukhaw, khik ni sagaga kani-an, khanno pay angon ni Ambin.

makkung khadu ......

JAJAMA NGANDAN

2009-03-08T05:16:00.001-07:00

Khik Kattik Inday Kacca, Mulli Mekhanay Sanak mengukha, pelajar mahasiswa, pagun liyom cawa Lappung di kekhami an, di pasakh, di angkot, di kampus ..........?

Kik bahasa Lappung mu lebbon haga tiseppok dipa, haga nyalah ko sapa ?

Reformasi tilapahi kham khadu papikha tahun, ngatas nama ko demokrasi, unggal warga khadu ngeddok kebebasan ngeluwah ko pendapat, protes, togok di ngewada pemekhittahan, mak lagi khabay-khabay, mak lagi watekh di tinjuk Plisi kik jak nyendekh ataw ngewada Presiden, hinno tanno sisi positif ni reformasi say dapok ti khasa ko kham jejama.

Api hubungan ni reformai jama budaya Lappung ?
Reformasi say di tutuki otonomi daerah, ngenni cukup ruwang gerak di perkembangan budaya Lappung, api lagi pemekhittah provinsi say dipimpin Gubernur dapok jadi pelopor khik penggerak bangkit ni budaya Lappung say selama hijjo, injuk hukhik injuk mawad.
Kepeduliyan ni pemekhittah provinsi jama budaya Lappung, yaddo da jadi penattu, maju mawad ni budaya Lappung.

Tugu sigokh say luwah anjak ide khik pemekekhan ni Bapak Syahruddin ZP selaku Gubernur Lappung dinana, jadi say bukti, kepeduliyan ni pemekhittah provinsi jama budaya setempat(Lappung)

Dapok ti bayang ko kham, seanday ni Gubernur mak peduli di budaya Lappung, katutuk moneh DPRD ni peddom mata, mak ukhung, layin hattak bahasa, kuk budaya Lappung say bakhih dapok tipasti ko haga lebbon, api mak khayya, di era reformasi jo unyin ni ngekhasa bebas, nasionalisme pelaleggohan tikkas, say luwah /cakak kesukuwan, say ngekhasa suku ni paling lamon, tahambung. Mak lagi peduli di bumi khang ni tiyan takhu, khang ni tiyan usaha, khang ni tiyan hukhik selama hijjo.

Say paling panjak tikhasa katti ni reformasi, say layin suku Lappung mak lagi mekhingoh ko budaya Lappung.

Say moneh cittu, mak peduli ni suku bakhih jama budaya Lappung, semakkung ni reformasi, papikha Radio swasta say wad di tanoh Lappung jo, lagi haga nyettel ataw motokh ko laggu Lappung, ya tukhun reformasi, na mak lagi, halok hijjo sisi tahok(negtif) ni reformasi.

Khappa di media audio visual ?
Di tanoh Lappung jo khadu wad papikha stasiun tv swasta lokal, malahan wad say bani makay gellakh(nama) Lappung, kidang, kanjak pekhtama siyaran togok tanno, makkung ngeddok acara ni say khusus/spesifik haga ngiwak ko budaya Lappung, misal ni bekhita say bubahasa Lappung, api lagi sinetron bubahasa Lappung, lagi tangih khik jawoh.

Stasiun tv say bakhih dapok juga jadi ubat, tiyan haga nayang ko klip laggu Lappung, kidang kah tak laggu so do, makkung moneh ngeluwah ko bekhita bubahasa Lappung.

Unggal nayang ko siaran langsung(live) khusus ni acara musik, stasiun tv lokal say wad di Lappung jo mak sekali haga ngukhaw/ngundang penyanyi ataw artis(rekaman) laggu Lappung. Padahal penyanyi laggu Lappung say khadu wad jak rekaman lamon bilangan ni.
Hinno say lagi bukti, tiyan mak peduli di budaya Lappung.

Moloh di bahasa Lappung, layin pissan minduwa, khadu khisok kham nengis bahwa tanoh Lappung jo massa julukan indonesia mini, disebab ko lamon suku bakhih say takhu/hukhik di Lappung jo.

Sebennokh ni, indonesia mini no doktrin say luwah semasa rezim orde baru bukuwasa, tujuwan ni kenyin warga say hukhik di tanoh Lappung jo, makay bahasa Indonesia, malahan dapok jadi, julukan indonesia mini no, salah satu cakhani penguwasa dinana ngalebbon ko bahasa daerah say suku ni kah cutik(minoritas) termasuk kham Lappung ? dapok jadi, asal kham haga ngingok, rezim(sistem) orde baru nyeppok cakha ngejadi ko Indonesia jo say suku, wad ni transmigrasi besar-besaran, ngatasnamako pemerataan kesejahteraan, masyakhakat jak tanoh jawa khadu pakhik(dipa-ipa) di sebabekhak ni nusantara jo, kik khadu khanno dapok ti tedduh(tebak) Indonesia jo jadi negakha ni sapa.

Mak dapok ngilak, situasi khik kondisi say goggoh khanno ngejadiko suku asli say jadi tujuwan transmigrasi jadi terdesak ulih kalah jumlah, khusus ni, tanoh Lappung say massa julukan indonesia mini, laju tambah sassak, doktrin hinno tanno nyadang di suku Lappung, khappa mak nyadang, menggakhik cutik goh jak pekkon ni, jamma Lappung jo khadu mulay bubasa Indonesia, ngekhasa bangga, gagah, halok malahan ngekhasa hebat, kik dapok bubasa Indonesia.

Ulih khadu takenna di doktrin indonesia mini no, uccuk-uccuk ni mak lagi bangga bubasa Lappung, togok di anak uppu, jak lunik mak lagi cawa Lappung, khusus ni tiyan say hukhik nyellang ataw say takhu di kota, padahal kik haga, ya di lamban ti tawway anak kham cawa Lappung, api say mak dapok. Kham senemmon makay bahasa Indonesia, kidang suku bakhih di tanoh Lappung jo pagun makay bahasa daerah ni tiyan tenggalan.

Mak ngeddok istilah sayuk asal kham haga, khusus ni sanak mengukha penekhus budaya Lappung say lagi nyeppok ilmu, Inday Kacca say status ni pelajar khik mahasiswa, biasa ni paling rentan haga jadi korban ni doktrin indonesia mini, khappa mak khanno haku, khadu jadi penakay, sanak pekkon say sekula/kuliyah di kota, emma ni mulay gonggong, cawa Lappung mulay pukakaluk.

Na, jak tanno, ti lebbon ko jak lom hulu kham doktrin indonesia mini say nyadang no, kik suku bakhih makay bahasa ni tiyan, masa kham mak ngeddok tangikhak makay bahasa kham tenggalan, bahasa Lappung.

JAMMA BALAQ

2009-03-08T00:11:00.001-08:00

Dabingi hijjo khani selasa kukhuk di khebbu, 20 kukhuk di 21 januari 2009, tengah bingi waktu Lappung(wib) bujuta pasang mata ngaliyak pelantikan presiden Amerika Serikat(AS), induh ya say ngaliyak langsung di negakha ni mamak Sam dudi, ataw say ngaliyak siaran langsung ni di tv.

Kik nukhud bekhita, presiden AS say mejjong di bilangan 44 ano, jamma kabawak halom pekhtama say jadi presiden disan.

Masyakhakat say kabawak halom ngekhasa hanjak, layin tak jamma halom Amerika khayya, sa uwad-wad ni ketukhunan Negro di alam wawwah jo ngekhasa bangga.

Bumacam lattakhan say ngabatang ko tiyan tahambung, ulih tumbay ni jamma Negro no kelamonan jadi budak ni jamma say kabawak handak, khadu pay jadi budak, di lom kehukhi an sekhani-khani tiyan jadi masayakhakat kelas khua(jamma hina), kik ngingok ko disan khasa ni haga mak bakal ketukhunan ni Negro no, wad say jadi presiden AS.

Dibatang ko Bapak tikhi, say kabennokhan jamma jak tanoh jawa, mula ni wad Obama lunik(sanak) napaq ko cukud ni di Indonesia.

Kippak mak benni takhu khik sekula di Indonesia, khupani lamon bitiyan say jadi pangingok ni khik-khik ni di nana, mak kacuwali mantan gukhu SD ni tumbay.
Mula pas Obama nyata bakal jadi presiden, khasa hanjak khik bangga taliba moneh di tiyan kamanno.
Wad say ngaku-ngaku muakhi, wad say ngalimak di anjaw khik di tagu Obama.

Sapayya ni pasti wad bitiyan khik ingo an, kik haga nganilay pribadi ni Obama, halok dapok kham buhakhap sikap ni bettik jama negakha bakhih, kippak ya layin sekutu ni Amerika, kidang khappa di Obama ni, lagi di ingok ko ni mawad ya jak takhu di Indonesia jo, lebih kukhang kah setahun, khasa ni mak makhellom ga kesan ni selama ya takhu di Indonesia.

Hal say mak dapok ti lupa ko kham, Obama no jadi presiden Amerika, ibakhat ni penuppang say mejjong di tundun ki ya mubil, kippak ya bos ni, kippak ya sakeddaw ni mubil hinno, pagun supir ni say ngendali ko stir, jadi maksud ni, mubil mewah khik supir ni say bani katutuk gagah no, yaddo da undang-undang ataw ya konstitusi ni negakha Amerika, say haga mak haga dipatuhi Obama.

Tok ko nemon ga buhakhap, dang hak ulih Obama jak takhu di Indonesia, makhi kham buanggopan angon ni Obama no ngalekkok di Indonesia.

Kippak ngakhasa kennal di ya, iya khadu jadi pakejjungan culuk ni Amerika, asing nemmon ni tibabujuk, pagun juga Amerika no haga ngilik khik nindas negakha-negakha say mak sepaham jama tiyan(Amerika).

DANG SIKKUH

2009-03-07T09:13:00.000-08:00

Ngabaca tulisan say wad di papan nama, di tugu, sukhat ataw di khang say bakhih ni, khisok khituk kham haga ngakhetti koni. Api mak khayya,
Dillom nulis ko bahasa Lappung, wad huruf say lebbon/tittok ko, atukhan ni wad khuwa huruf, hinno kah ti tulisko say.

Ngaluwang huruf say atukhan ni khuwa jadi say, hinno haga ngakhubah maknani cawa/kata ataw gellakh, induh ya gellakh ni pekkon, kota, pasakh ataw say bakhih ni.

Dikanik hakal kodo, mak ngeddok huruf say ti tulis, kidang wad di baca an/cawa, akik huruf ni ti tulis khuwa, khisok ni kah ti baca say.
say goggoh khanno layin emma ni jamma Lappung,

........... awas nyadang ............

cittu ..........(contoh)

- jama : dengan
- jamma : orang
- kukuk : gempa bumi
- kukkuk : bubur

semisal wad cawa say ti tulis :

- di lamban wad jama pikha, ataw
- jinna bingi sikam nganik kukuk khakhami an

Say senangun jamma Lappung lalang ngabacani, say lagi belajakh bahasa lappung bingung, khappa mak bingung/khituk, atukhan ni kata jamma huruf m ni ti tulis khuwa, hinno kah ti tulis say, khanno moneh di kata kukkuk.

Sumang jak nyippang khetti ni, kik kham ngebaca tulisan say mak ngeddok panekanan di kata-kata ni, ulih ti luwang say huruf, say atukhan ni ti tulis khuwa, mak ukhung nyannyah khik janggal di cuping/panengis, malahan say ngabaca ni laju kaluk emma.

Cittu bakhih say kukhang tebbong kik nukhut guwaybettik,
yaddo da khayya kinjuk :

- pekkon ti tulis pekon
- lebbon ti tulis lebon
- bellu ti tulis belu
- hattak ti tulis hatak
- jimmoh ti tulis jimoh
- bettung ti tulis betung

Papikha cittu datas no jinna, yaddo da bagiyan lunik jak say lamon, dillom cakha nulis ko cawa/kata, khik gellakh dillom bahasa Lappung.

Payu kham jajama ngakaji ni, kenyin bahasa Lappung kham jo mak kesekh jak hejjong ni, dang sappay ya haga messuh, lattakhan lamon ni tekanan khik pengaruh jak bahasa say bakhih.
Kakalaw bahasa Lappung jo pagun jadi jati dikhi kham Lappung.
Makay bahasa Lappung say tebbong, jak di pubalahan togok di cakha nulis ko ni, kakalaw ya dapok jadi pengikok khasa akkon khik kemuakhiyan kham Lappung.

Dang ti tagan ko hulun khatong nyadang, api lagi haga ngalebbon ko khik ngacak-acak bahasa Lappung.

NGUKUP NGAKHULUQ

2009-03-07T05:35:00.000-08:00

Wad sanak mulang miwang, ngadu di hulun tuhani, mamayinan ni di akuk sanak bakhih. Khadu lamon panggaginak, khappa cakha ni nyin anak ni ngahaman. Kidang mawad, pagun juga salossokan. Ina Bapak ni khituk ngagagunik khik nyeppok cakha nakhu ko hiwang ni sanak hinno.
Buttak cakhita induh temmon induh mawad, sanak hinno jinna ngahaman miwang ulih dijanji ko hulun tuha ni, haga ngabelli mamayinan say muaq.

Di sumang khang wad makhanay khigu, laju khusuh malik ko jamma sanga pekkon, kuk say mak panday di lattakhan ni tukhuk nengah pekhang.
Luwah unyin bessi pasello an, mati say mati andah ni guway hinno. Tukhun pekhang khadu takhu, kada an khadu mayyop, satottong-tottongan, kicik hamma ni mulang tiyan, api pay do lattakhan ni mula kham jo khusuh.

Jamma lagi sangamuakhiyan, ya di panday ni puakhi ni haga ngebba binasa, mak mekekh khua kali tapok nyabuk ko peddang, mak lagi satanya api ngebba ni mula puakhi ni khusuh.
Ya tiyan panday, kalemmohan pakhwatin, anak-anak ni tiyan khayya say ngasaseppok, khappa mula mulli khadu di khasan ko khoppok bang haga tigaga, padahal semakkung ni mulli hinno khadu nyata nulak ya, kidang ya pagun nyassang, na, mak takhu kammak khusuh.

Layin lagi di cekhita ni jamma tuha, jamma say khadu bulambanan, asa lapah duma ataw mid kebbun, bang ya sanemmon ngakakesekh ko langan. Segala cakha di guway koni nyin tanoh ni tambah bekhak. Mawad ya peduli kippak hulun cadang, say petting hati ni pappan.

Kisah datas no nyakhita kon sifat tangusung(alami) ni manusia. Ngakhuluq say dinni khoppok, ngakuk bagiyan ni kaduwa, ngahalal ko segala cakha nyin tujuwan ni tercapay.

Khadu lamon kejadiyan mulang muakhi sepatiyan ulih segaga hakhta, anak mati ko bapak, mahani nikol nabbay, hinno tanno mak bakhih, mak khuwa mak tellu ni ya haga ngukup unyin ni hakhta.

Kik nukhud papikha pakar jamma jo mak ubah ni binatang, sebab penakay tangusung kanjak lahekh(insting) say wad di dikhi ni unggal jamma, yaddo da haga ngukup(menguasai sepenuh nya secara paksa) khik ngakhuluq(merebut secara paksa) api ya ni say wad di bumi jo.

Ngukup khik ngakhuluq lunik kemungkinan ni haga tekhjadi, kik diguway ko jamma pusay-say(nenggalan), kippak ya wad mak malamon, ya ulih jamma jo mak dapok mak, di batasi atukhan.

Atukhan say paling muttlaq yaddo da atukhan ni Tuhan.

Suku Lappung khusus ni, yakin, Islam say-say ni atukhan say paling haqiqi, hal hijjo di bukti ko jama kenyata an, unggal jamma say ngaku suku ni Lappung pasti agama ni Islam, kippak ya kelamonan mawad ngelaksana ko sakhi at say di gakhis ko(ditetapkan) di lom Islam khayya kinjuk sembahyang(sholat) wajib say jadi salah satu ni khukun Islam, ataw istilah say umum ni ti ucak ko islam ktp. Hal hijjo dapok ti maklumi, ulih api, nangun temmon ya lahekh khik balaq di lom keluarga Islam(islam keturunan) kidang kelamonan pendidikan agama ni lagi kukhang, Islam say jadi agama langit terakhir, jadi atukhan say paling lengkap(sempurna), jak hal say paling lunik togok di pekhkakha say paling balaq, jak ukhusan tanggay khik bulu ni badan togok di cakha budagang khik butatangga, unyin ni wad di lom Islam.

Islam di tukhun ko Tuhan di bumi jo pakay ngimbangi naluri binatang say wad di dikhi ni unggal jamma, khanno hani kaban ni Alim(jamma say bu ilmu)

Kik ya wad sanak say nakal, sepennuh ni lagi tanggung jawab ni hulun tuha, sappay ya dapok ngabida ko say bettik lawan say mak mahellau.

Wad moneh say sabellik no kelompok ataw negakha, kik khadu cakak di negakha ukhusan, biasa ni wad hubungan ni jama politik, kekuwasa an, say selalu haga nguwasai kinjuk ya hasil bumi, minyak, ataw haga ngabekhak ko wilayah ni negakha. Kik say ngekhasa terjajah mak nekhima, khadu pasti wad pekhlawanan, ujung-ujung ni pekhang.

Tanno say panjak di mata pekhang hantakha Palestina lawan Israel(2008 akhir hingga awal 2009), disan say haga ngukup khik ngakhuluq yaddo da Israel hinno, Palestina nangun takhu di khang ni tiyan, kidang Israel selalu nyeppok kesempatan ngejajah ulih ya haga ngabekhak ko wilayah ni negakha ni. Khadu khatusan jamma Palestina say mati, induh kapan pekhang no haga bukhadu.
Kekalaw tiyan say ninggal no mati sahid.
Lamon relawan say haga lapah jihad mid Palestina, kekalaw ki ya di dukung negakha ni masing-masing, nyin tiyan dapok nulung warga Palestina pekhang ngelawan si kapekh Israel no, nyin Israel no lebbon jak petta dunia, nyin masyakhakat Palestina dapok hukhik damay, amin.

LIYOM CAWA LAPPUNG

2009-03-06T14:45:00.000-08:00

Mulang jak kakhajja, coccok penggekh khanglaya nunggu angkot, ya angkot takhu nyak cakak.

Lom angkot khamik juga mawad kik latap kidang seddong pellik ni. Lom angkot nyak tungga khik say mulang jak kakhajja siya, kidang sumang khang.

Ulih ngekhasa kennal mula ya kutagu, kutagu cawa Lappung, iya nimbal makay bahasa Lappung moneh, biasa gellakh ni tungga khik munggak meddoh pubalahan.

Sikam khua lagi tengah bubabah, nyenggulap khik ni khik ku no jinna, cawani :

"keluar bahasa Inggrisnya"

kutanya di khik ku no, sapala iya no, api suku ni, mula ya cawa khanno, Lappung ano so, kidang halok ya liyom cawa Lappung, timbal ni khik ku.

Makkung luwah jak tanoh Lappung, hak mak haga cawa Lappung, ya nengis khoppok cawa Lappung ti ucak ko bahasa Inggris.

Kik haga tikaji, bahasa Inggris no kan bahasa asing maksud ni, khappa haga mak sassak, bahasa kham tenggalan tucak ko bahasa asing.

Khadu lamon/nayah say cawa, papikha tahun say haga khatong bahasa Lappung kham jo haga punah, halok lamon bennokh ni cawa hinno, tok ko haga hulun, akik kham say jamma Lappung ngekhasa liyom cawa Lappung di tengah kekhami an.

kalah hulu kodo ?..........induh

Kidang kik haku jamma say goggoh khanno, senangun ni jamma salah pengkhasa, mak bangga di budaya ni say tatuha, tanyimbang jak Uppu Tuyuk kham tumbay, tangih haga nawway koni di suku bakhih kuk nyaccan ni ya mak haga, ya wad hulun ketawwayan cawa Lappung, na mulay ti tawway cawa khuta.

Mawad bahasa Lappung jo lebbon kik mawad andah kham tenggalan, khanno moneh da, mawad ya haga jaya kammak jak kham ni siya.

HIWANG SAKIK

2009-03-06T08:00:00.000-08:00

Lamban ku lamban kubu
Hatok ni bulung liyoh
Kippak nyak menna nagu
Pagun tiyan manyuwoh

Sikkapan bulung bakhu
Panjulang batang geddang
Linguk sapa say liyu
Bugaggan nyaccang hinjang

Sakik kaliwad sakik
Say kenna di dikhi ku
Najin puwakhi khamik
Api pak mati niku

Yukidah sanak lunik
Makkung ngeddok tameggung
Kippak wad salah cutik
Tikhimbad makay candung

Lunik nuppak di puwakhi
Pamengngan nutuq tiyan
Malih do niku hani
Seppok puwakhi sumang

Mawad keccah pakayyan
Kik mak moppoh nenggalan
Nabbay say ngandan badan
Saseggok di kani an

Mahani kindo haku
Mula nyak khatong di ya
Mak khippak nyeggung hulu
Lemmos takebba maya

Bitiyan kak dinana
Hiwang mak juga bella
Ina mak dapok cawa
Bapak ngandan anak tuha

Balaq malih jak pekkon
Lapah nyeppok hakhungan
Tanno lamon say ngakkon
Ngalimak kekikhiman

basa LAPPUNG dillom huruf cetak/latin

2009-02-28T17:51:00.000-08:00

Penulisan basa Lappung dillom huruf cetak/latin, mak dapok kik haga ti goggoh ko jama penulisan kata di lom bahasa Indonesia, penulisan di lom bahasa Indonesia say bukiblat jama ejaan yang disempurnakan (eyd) 1972, selalu haga ngejadi ko unggal kata say tipakay jadi buttak, praktis(sesingkat mungkin) wad kata say ti luwang huruf ni, wad say senangun tisingkat ataw malahan ti khubah nyin sesuway jama emma ni jamma Indonesia, (jamma Indonesia say hippa dano)

Papikha cittu penulisan basa Lappung makay huruf cetak, say dapok ticawa ko salah :

- heni, atukhan ni : henni
- bahuga, atukhan ni : bakhuga
- ragom, atukhan ni : khanggom
- srengsem, atukhan ni : sekhossom, khik lamon cittu bakhih.

kata ataw istilah dillom basa Lappung mak dapok ti khakhubah, induh ya cakha nyawa koni ataw cakha nulis ni, kik mak tebbong di penulisan ni, bukhubah/sumang moneh di khetti ni.

Cakha ngehija basa Lappung kik makay huruf cetak,
cittu :

- luah, tibaca : lu-ah ..... say tebbong tulisan ni : luwah
- manjau, tibaca : manja-u ..... say tebbong tulisan ni : manjaw
- tian, tibaca : ti-an ..... say tebbong tulisan ni : tiyan

penjelasan :
1. semakkung ni huruf a di kata lu-ah, wad huruf w say jadi kelabay ni disan, kik bupatokan jama aksara ka ga nga, kata lu-wah no, kelabay wa ni, wa kelengiyah(ah) yaddo da anak huruf say wad di kebellah kanan ni kelabay, sedongkon kelabay a ni mak ngeddok di kata luwah.
2. di kata man-jaw, kelabay ja ni, ja tekelungaw(aw) yaddo da anak huruf say wad di bah ni kelabay, ja tekelungaw jadi jaw, acak makay w layin u, kik makay u penulisan ni, ya tibaca man-ja-u.
3.khanno moneh di kata ti-yan, di kata tiyan jo, kelabay ya ni, ngeddok anak datas say kegakhis khuwa(an), ngahija ni ya datas yan, kik ya ti tulis tian, khetti ni wad kelabay a say ti kukhuk ko disan, bunyi ni jadi ti-an.

Na khanno da singkat ni, api mula penulisan basa Lappung di lom hurup cetak/latin, mak dapok kik haga nawak cakha penulisan bahasa Indonesia, basa Lappung patokan ni di aksara ka ga nga.

Anjak bahasa melayu.
Bahasa Indonesia say awwal ni yaddo da bahasa Melayu, makhi wad penambahan jak bahasa daerah say dominan, bahasa asing(import) khayya kinjuk bahasa inggris, di dunia ilmu pengetahuan kham ngehalu gellakh ilmiah ni bumacam tanoman(tumbuhan) say khisok ti cawa ko nama latin/nama ilmiah, ulih ya makai bahasa latin, khik lagi lamon say bakhih.

Papikha cittu kata semakkungni wad eyd, khik cittu kata import :

- djaya : tanno titulis : jaya
- tjinta : tanno titulis : cinta

- university : jadi : universitas
- quality : jadi : kwalitas

Khusus istilah import, atukhanni(semestinya) jak awwal pemekhittah mak pekhallu ngekhakhubah ya, ataw ngesesuway koni jama emma indonesia, akibat ni kelamonan jamma indonesia so kak cawa khisok mak tebbong/kepleset kak ngucak ko kata say kelikoh(rumit) khusus ni kata/istilah import no jinna.

cittu kata say khisok mak tebbong di emma indonesia :

- karburator jadi kabilator.
- backing jadi dekeng.

Khanno da sassak ni, emma ni jamma Indonesia jo.

wad moneh kata say bukhubah cakha penyebbutan/penulisan ni, khayya kinjuk :

- tiada tahu : tanno jadi : tidak tau
- tiada mengapa : tanno jadi : tidak apa

Bahasa indonesia massa(dapat) pengaruh moneh jak media massa, elektronik ataw say cetak. Na, kik ukhusan say hijjo, jamma say terlibat langsung(awak media) disan say ngejadiko wad ni pergeseran kata khik istilah, ataw kosa kata say muwaq(baru).
Wartawan khik penulis naskah bekhita jadi penattu khik penyumbang(pengaruh) say paling balaq wad ni istilah khik kosa kata say muwaq di media, hal hinno dapok disebab ko anjak latar belakang ni tiyan, khayya kinjuk budaya, suku, khik faktor pendidikan.
Halok kham butatanya, wad kodo jamma say bani ngelamar kekhajja jadi wartawan kik tiyan mak ngeddok latar belakang pendidikan jurnalistik?, jawaban ni mak ngeddok, api lagi di era kompetisi tanno hijjo, unyin ni sekhabba kettat, kham jejama panday, kik haga ngandal ko kemampuan/skill, kidang ijazah mawad, mak ki haga wad pengakuwan, di Indonesia jo makkung ti pakay kik ijazah ni makkung langgakh.

Faktor EGO.
Pendidikan langgakh, spesifik di dunia jurnalisme, bahasa Indonesia nalom, kidang acak, papikha tahun terakhir hijjo, kaban ni awak media injuk mak panday/lupa di bahasa Indonesia.
Halok layin mak panday ataw lupa, kattu ya sangun senghaja haga ngiwak(ngangkat) ko basa(daerah) ni tenggalan.
Mak cukup tak isan khayya, iklan tv khik radio, mak luput moneh jadi khang ni tiyan ngemaksako idealisme ni tiyan, edialisme penjajah, mak pati ni hakal ni, cukup tak budaya ni tiyan khayya say cakak. Kik senangun haga, lapah pay tiyan keliling nusantara jo, lagi lamon budaya di nusantara jo say pekhallu ti iwak(angkat) ko, kidang mawad, mak disan angon ni penjajah, budaya bakhih kemayangan kik hak lebbon.

Dibbah jo papikha cittu kata/istilah, say jadi produk ni awak media khik iklan, say wad akhir-akhir hijjo :

- anjlok, lebih kukhang khetti ni : 1.turun drastis, 2.terjerembab
- di gadang-gadang, lebih kukhang khetti ni : di harap-harap
- roso/rosa, lebih kukhang khetti ni : perkasa

kik perbendaharaan kata ni khadu wad di lom bahasa Indonesia, khasani mak pekhallu lagi ngeluwah ko bahasa daerah!

Salah kodo kik sikap ni tiyan goggoh khanno ..........?
Pekhallu kodo wad penyaringan istilah jak daerah say sukuni dominan ..........?

Pekhallu wad pengendalian.
Dang ulih ngekhasa lamon hak haga lelajuwan, bahasa Indonesia say jadi bahasa pekhsatuwan, seharus ni pagun jadi pegungan di lom bubangsa khik bunegakha, kippak khappa ya juga khasa nasionalisme pagun pekhallu, dang sappay dominan ni suku tertentu malah nimbul ko kecemburuan sosial, khasani mak bijaksana, guway/kegiatan say cakupan ni(skala) nasional, kidang tihattakh di haya an ni pakhwatin say khamik, mak sekali ngeddok nilai pekhsatuwan khik nasionalisme, uccuk-uccuk ni, masyakhakat say ngekhasa suku ni cutik(minoritas) ngekhasa nuppang di bumi khik negakha ni tenggalan, padahal kham khadu wad ikrar(pembukaan UUD 45) bahwa asing ya tuppah(bentuk) ni penjajahan di lambung bumi jo harus ti lebbon ko, kik mak hati-hati, pagun wad khayya daerah di Indonesia jo say ngilu merdeka.

Kearifan lokal.
Indonesia jo mak kik ngeddok budaya, say wad budaya so yaddo da daerh-daerah say wad di wilayah negara kesatuan republik indonesia(nkri), kekuatan budaya daerah hinno tanno say jadi nyawa/jiwa ni kebudayaan Indonesia, masalah ni tanno, kelamonan masyakhakat Indonesia jo makkung dapok ngebabagi khasa, kapan ya ngebila budaya daerah ni tenggalan, kapan khasa nasionalisme ni ti pakay.
Ngapubalah kearifan lokal, lebih kukhang khetti ni kik nukhud sikam; mengakui tradisi, adat istiadat, say wad di masing-masing provinsi, tradisi khik adat istiadat no, jadi say di lom pakay say ti sebut budaya, budaya say di maksud yaddo da budaya ni suku asli say wad di provinsi hinno, di provinsi Lappung suku aslini yaddo da suku Lappung, mula ni haga mak haga, suka mak suka, budaya Lappung jadi jukhagan lamban(tuan rumah) di tanoh Lappung jo.

Budaya daerah bukembang dipa?
Say paling mudah kham nunjuk ko jakhi, budaya daerah tuwoh khik balaq di khang say ti sebbut provinsi, ulih api? yu nangun seharus ni disan, kippak wad suku ni daerah hinno di provinsi bakhih, pagun daerah anjak/asal ni, say meggung tanggung jawab say paling balaq, lestakhi mawad ni budaya ni daerah hinno.

Acuwan khik pusat budaya.
Kik wad hulun haga neliti, belajakh atau memahami budaya Lappung, tattuni tiyan haga mak haga khatong mid tanoh Lappung jo, khanno moneh jama daerah bakhih, say wad kepentingan tattu ni khatong mid di provinsi say sesuway jama budaya asal say jadi tujuwan.
Suku Lappung say jadi pewaris tunggal ni kebudayaan Lappung, kippak ya kah cutik(minoritas), pekhallu wad khang, wad ruwang, wad dukungan khusus ni anjak pemekhittah provinsi khik DPRD Lappung, dang sappay senginah ni ya minoritas(kippak di daerah ni tenggalan), hak haga laju tikacay ulih ngatasnama ko demokrasi, misal ni : wad tim keseniyan Lappung, say nutuq(berpartisipasi) guway di luwah Lappung, khayya kinjuk pentas/parade kebudayaan nusantara, ataw api gawoh lah gellakh ni, ya tiyan massa gelekhan tampil/nengah, hak ngeluwah ko takhi keccak ataw campur sari, layin ngeluwah ko senni(budaya) Lappung.

kik kham mak bugaggan masang penakkis jak tanno, keseniyan khik budaya Lappung, balaq kemungkinan ni haga di gatti ko(berganti) jama kesiniyan khik budaya anjak luwah Lappung, ulih api, khadu lamon artikel di papikha media massa, say ngujay kon bahwa, suku bakhih say wad di Lappung jo ngakhasa, selama hijjo tiyan jadi warga kelas khua, ngakhasa sebagay warga pendatang.

Sebennokh ni anggopan hinno, berbanding terbalik dengan kenyataan, sebab api, jak segi ekonomi, pendidikan ataw ya kesempatan bu usaha, mak ngeddok bida ni, suku bakhih ataw suku Lappung, unyin ni suku wad hak khik kesempatan say goggoh, tergantung jak kemampuwan, kecerdasan khik kecakapan masing-masing jamma, malahan suku bakhih say wad di tanoh Lappung jo pukaya-kaya, kik temmon tiyan warga kelas khuwa, mak ngeddok cekhita ni, tiyan dapok jadi sarjana, mak ngeddok tiyan say jadi aparatur pemekhittah, ti liyak kham khayya, armada angkutan ni tiyan khusus ni angkutan darat(Bis/Angkot), merajai sakakejjung ni khang laya say wad di tanoh Lappung jo, api lagi kik kham haga ngaliyak di pasakh, ruko, moll, ataw ya pusat perbelanja an say bakhih, suku Lappung kodo say nguwasai ni, kik temmon, cuba ti hitung pay, pikha jamma Lappung ni say wad disan .... ?
Hak haga pagun ngukhang ???

Kik ulih tiyan ngaliyak keseniyan khik budaya Lappung sattokh(selalu) tampil paling hadap, makhi tiyan bu anggopan budaya Lappung jo jadi anak emas, hak laju tiyan ngakhasa jadi warga kelas khuwa, pengkhasa khik anggopan ni tiyan no, salah hejjong gellakh ni. Haga hukhik khik balaq dipa kidah budaya kham Lappung, kik mak di tanoh Lappung jo.
Kik tiyan mak nakhima budaya Lappung selalu ti hahumbu, khappa haga laju ni budaya Lappung jo, akik ti papupuk khisok payah haga cakak, payah nyellak ko badan khik payah mahengas, di cacekkik lamon ni budaya bakhih. Di ukhusan budaya jo, mak dapok ti tatawakh, dija nangun berlaku hukum, budaya asli(pribumi) ataw pendatang, mahap khayya, nagun khanno hejjong ni.

Suku Lappung khadu goggoh jamma nuppang, ti liyak jak segi api ya ni, cuba ti pennyin ko pay, suku Lappung kik haga tiliyak jak sosial budaya, sosial politik, khadu haga mak dapok menggakhik(nyaris tidak ada ruang gerak), api mula khanno haku ;

pekhtama : jamma Lappung, bubasa Lappung kik di lingkungan pekkon khayya, khanno moneh di anak, kik hulun tuha ni nyellang, sanak mak lagi panday cawa Lappung, ya tikkak mata ni di alam wawwah jo tuppak ti tawway bahasa Indonesia, ulih lingkungan ni tiyan layin Lappung ataw alasan ni, katubbang payah kanah kak tiyan sekula, mak panday bahasa Indonesia. Hinno lagi di anak, khappa kak di uppu jimmoh saway?

kekhuwa ni : katti ni wad pemilu langsung, khasa kesukuwan jadi tambah subur, say nyalon(caleg) nulis ko pesan khik slogan di poster, makay bahasa daerah ni, makhi poster hinno ti pasang ko dipa-ipa, hakhapan ni nyin massa dukungan jak suku ni tenggalan, khanno moneh di say milih, ulih ngekhasa sesuku jama caleg, mak mekekh-mekekh lagi, mak ngeliyak program ni api, pukuk ni asal say suku, pekhallu ti dukung, akibat ni api, kik suku ni tiyan suku mayoritas, khadu tattu tiyan mennang, kik tiyan mennang tiyan bu kuwasa.
Lagi di kampanye ni gawoh, si caleg no jinna kah peduli di suku ni khayya, khappa ya kak mennang kanah, khadu dapok tipasti ko, mak ya peduli di suku bakhih khusus ni suku khik budaya Lappung.

Anjak sebab akibat say khadu ti ujay ko datas no, sangun mak mudah budaya kham khusus ni bahasa Lappung jo, haga bukembang khik memasyarakat(temakay) di tengah suku bakhih, tok ko haga di suku bakhih, jamma lappung ni gawoh, tanno lamon say mak panday cawa Lappung. Ibakhat ni ya khacun, khadu pakhik(menyebar) di unyin ni badan, ibakhat ni kani an, ya khadu jadi khah khik daging, mak ngeddok ubat khik mak dapok ti khubah, kidang kippak ya khayya, bacak sayuk jak mak sekali, payu kham jejama ngemulay ni, moloh ngemulay jak awwal, ti mulay anjak "nol" kekalaw ya wad ulih.

KAMUS lunik LAPPUNG-INDONESIA (sub dialeg api Semaka Tanggamus)

2009-02-28T07:19:00.001-08:00

menara Sigokh tiliyak jak haguk lawok (sisi timur)

A
Abak : besar, dedengkot
Abang : panggilan untuk saudara laki-laki yang lebih tua dari kita

Abik : kain panjang untuk menggendong
Acak : mengapa
Acangacang : burung merpati
Acingacing : benda kecil yang menyembul keluar, seperti jarum, duri, lidi, dll

Acung : tendang
Adoq : 1.julukan, 2.alias
Aduy : aduh, kata yang terucap ketika merasakan sakit
Agas : nyamuk
Ajang : perlengkapan makan
Ajo : ini
Ajoman : pujaan, idaman

Akan : ayah, panggilan penghormatan terhadap(Dalom) kepala adat saibatin

Akan-akan : cempedak
Akuk : ambil
Akkuk : pencabut bulu(pinset)

Akkuk-akkuk : sejenis lebah/serangga rumah, yang sarangnya terbuat dari tanah

Akkos : kain untuk ikat pinggang
Akhi : tiang
Alam : jagad
Alam wawwah : jagad raya
Alim : 1.orang baik-baik, 2.orang berilmu
Alu : biawak
Ambin : singkir, tersingkir
Ambuk : cabut

Anak : 1.anak kandung, 2.suku
contoh : anak tumi=suku tumi

Anak nakan/nakan : keponakan
Anak mattu/mattu : menantu
Anak mayaw : jari manis
Ano : itu, menunjuk sesuatu yang masih dalam jangkauan

Anom/manom/manam : senja
contoh : 1.dang anom ga=jangan terlalu senja
2.khadu manom=sudah senja

Apay/sulan : tikar
Appay : baru, Appay sappay : baru sampai
Api : apa
Apung : pelampung jaring
Apuy : api

Appin : kain pelapis tangan untuk mengangkat benda panas, atau untuk mengangkat sesuatu yang menjijikkan

Appun : ampun

Asa : memberi kepercayaan, mempercayakan suatu tanggung jawab

Asa-asa : melakukan sesuatu di luar tujuan semula
contoh : asa mandi bang misol=katanya pergi mandi, ternyata menangkap ikan

Asah : mengasah
Asahan : batu asahan

Asakh : 1.waktu sholat asyar, 2.mencuci dengan tanah, abu, pasir, sikat untuk benda yang terlalu kotor, seperti alat dapur atau benda yang sangat berdebu

Asing : 1.sembarang, 2.seperti apa pun/bagai mana pun
contoh : 1.asing ya ni= yang mana saja
2.asing jawoh ni=sejauh apa pun

Asingasing : sembarangan
Asom : buah, pohon asam
Asuq : sebutan untuk tempat yang susah di jangkau
Atakh : kawasan
Atukh/atokh : atur
Atung : kayu/bambu tempat meletakkan lantai bangunan panggung

Attak : antar, Attak ko : antarkan
Awang : masa, zaman

Awi/Kawokh : bambu
contoh : kawokh gading=bambu kuning

Ayuk : kata sifat yang berarti kebiasaan
contoh : 1.ayuk ni=biasanya
2.goh ayuk ni=seperti biasanya

Ayun : ayunan

B
Ba-al : payau(rasa)
Baban : bawaan

Babah : bincang, obrolan
contoh : 1.bubabah=bincang-bincang/bercakap-cakap
2.balaq babah=besar omong

Babang : asuh
contoh : 1.ngababang=mengasuh
2.babangan=momongan

Babbay : perempuan
Babitting : ikat pinggang
Babukha : bumbu dapur
Babuy : babi

Bacak : kata yang berarti menegaskan pilihan
contoh : 1.api bacak/hippa bacak=pilih mana
2.bacak mengngan api bacak buwak=pilih makan atau kue

Bacakh : 1.layak, 2.cengger ayam
Baccong/Nihan : sangat, lebih
Badan : tubuh
Badik : senjata tajam dari jenis pisau
Bagokh : mati rasa
Bagellog : telanjang
Baha : sisir pisang, Sanga baha : satu sisir pisang
Bahikhang : kumbang (batang kelapa)

Bajang : 1.buah kelapa yang masih sebesar telur ayam
2.sebutan untuk orang yang masih muda/anak-anak

Bajaw : bajak laut
Bak : ayah
Bakas : pria
Bakkay : jasad
Bakkang : kosong melompong
Bakhak/Banjekh : banjir
Bakhallay : bangle

Bakhih : lain
contoh : say bakhih=yang lain

Bakhilang : 1.belerang, 2.korek api
Bakhu : waru
Bakhuga : ayam hutan

Bala : balak
contoh : nyeppok bala=cari penyakit

Balajakh : belajar
Balang : belalang

Balaq : besar
keterangan : kata balaq menggunakan huruf q bukan k, hal ini untuk memperjelas perbedaan dalam mengucapkan kata balaq dan lunik

Balay : lumbung padi
Balekh : aqil baligh
Balik : terbalik
Baliq : kembali

Baling : di balik
contoh : baling khangok=di balik pintu

Baluk/Kiduk : sembab(mata)
Balukh : ikan teri(atau yang seukuran) yang dikeringkan
Balun : kain kafan(baju) orang mati

Bambang : kata dasar dari kabur(dibawa atau membawa)
contoh : 1.bambangan=seseorang yang diperdaya oleh Jin/makhluk halus, hingga seakan-akan menghilang
2.sebambangan=pergi meninggalkan rumah secara diam-diam atas keinginan bersama antara dua orang, pria dan wanita, dengan tujuan untuk menikah (dalam banyak kejadian sebambangan, biasanya sang Gadis meninggalkan sepucuk surat yang diletakkan tidak jauh dari tempat tidur Sigadis seperti di bawah bantal dan sebagainya, yang menerangkan dengan siapa dia pergi serta kemana dia pergi, dan tidak jarang Sigadis pergi sebambangan mengajak sahabatnya ikut serta, secara otomatis, ada pihak lain yang mengetahui kalau ada anak gadis yang pergi sebambangan dilingkungan mereka, hal ini dikarenakan sang sahabat Sigadis yang sebambangan tadi berpamitan kepada orang tuanya bahwa ia ikut serta menemani karibnya pergi sebambangan)

Bani : berani

Banjakh : berdampingan/bersebelahan
contoh : 1.Kabanjakhan=tetangga, 2.Banjakh sapa?=berdampingan/bersebelahan dengan siapa?

Basa : tutur, bahasa

Basuh : cuci, membersihkan(sesuatu) dengan air
- basuh culuk : cuci tangan
- basuhan : piring kotor dsb
- babasuhan : mencuci piring
- pambasuhan : tempat mencucu tangan pada saat makan(menggunakan mangkuk dll)

Batang : pokok/batang pohon
Batang galah : anak ke dua
Batangakhi : sungai
Battah : perang mulut
Battal : bantal

Batuy : ratap, menangisi orang mati
contoh : 1.ngabatuy=meratapi
2.bubatuy=tradisi meratapi orang mati, bisa berlangsung berjam-jam, secara bergantian, sekarang dilarang/ditiadakan, karena tidak sesuai dengan ajaran Islam

Bayu : basi
Bayuk : bakul tempat nasi
Bawak : kulit
Bawak kicak : kulit ari
Bebbekh : bibir
Bejji : jengkel
Bekhkhak : lebar, luas
Bekhkhay : gerimis

Belasa : buah nangka, batang nangka
contoh : 1.belasa=nangka yang sudah tua/masak
2.kemunduk=nangka muda(biasa untuk sayur)

Bekkas : melesat(anak panah/peluru) dsb
Belanga : panci
Bella : habis

Bettik : baik, bagus
contoh : kaway bettik=baju bagus/baru

Bettoh : lapar
Bettong : kenyang
Bettus : meletus
Biding : tepi
Biduk : cobek, tempat menggiling bumbu dapur/sambal
Bihom : pipi
Bimbing : mengenang orang yang jauh
Binasa : aniaya, mendapat celaka/kecelakaan
Bittokh : betis
Biyas : beras
Bolok : 1.keruh(air), 2.banyak pikiran, pusing, kalut
Botekh : kutil

Bu : adalah awalan yang mengandung unsur kata kerja, baik sedang berlangsung atau dikerjakan dalam kurun waktu tertentu.

contoh: 1.budandan=berdandan, 2.bukhikkos=berbenah(kedua contoh ini merupakan kajadian/pekerjaan yang "sedang" berlangsung)

contoh lain: budakhak=berladang(umumnya padi), ini adalah contoh pekerjaan yang berlangsung berdasarkan periode/siklus, dimana peladang sebagai subyek dianggap bekerja dalam satu siklus tanam(dari pengolahan lahan sampai panen) meskipun diselingi istirahat beberapa hari/waktu.

Budak : babu
Budakh : bangkai

Budi : kata sifat yang menegaskan kelicikan seseorang
contoh : 1.babudiyan=berpura-pura
2.sabudi=ingkar janji

Budik : bohong
Bugaggan : bergegas
Buha : buaya
Buhingga : bersiap-siap
Buhung : dusta, omong kosong
Bukkang : kembung(perut)
Bukha : ramuan, racikan(pelet)
Bukhadu : berakhir
Bukhak : 1.jelek(rupa), 2.lapuk, usang

Bukhih : lulur
contoh : babukhih=berlulur, biasanya menggunakan kunyit yang digerus halus

Bukhung : 1.burung, 2.borong
contoh : ngabukhung=memborong

Bulakh : rabun
Bulamban : berumah tangga
Bulup : balut, Ngabulup : membalut
Bulung : daun
Buttak : pendek

Buwah : 1.pinang, 2.buah-buahan
contoh : 1.cakak buwah=panjat pinang
2.ngabuwah=berbuah

Buwak : kue
Buwok : rambut
Buway : garis keturunan
Buya : capek
Buyung : bayi laki-laki yang belum punya nama

C
Cabi : cabai
Cabuk : tercabut
Caccah : kera putih/simpai
Caccan/cating/pegung : pegang
Caccap : cacah
Cacikhik : jangkrik
Cadang : rusak
Cakak : 1.naik, 2.panjat
Cakkekh : 1.cangkir, 2.buah kelapa yang belum ada dagingnya

Calaq : gagah(pria)

Caluk : kaki hewan ternak yang diasap, biasanya disimpan dalam waktu yang lama

Calupaq : dudukan lampu minyak

Cambay : sirih
Cattik : comot, nyattik : mencomot, mengutil
Cawa : bicara
Cawa khuta : bicara jorok/porno
Cawa cutik : bicara sedikit/komentar singkat
Cikak : bacok
Cikan : hampir, nyaris
Cikhik : ceret
Cikhik galing : masyarakat bawah/masyarakat kebanyakan/rakyat jelata

Cobol : colok
Conggok : angguk, mengangguk
Cubik : cangkir
Cukik : usil
Cukud : kaki

Cukud calung : sebutan untuk anak yang selalu bepergian/pergi bermain

Cukhaq : sotong(sejenis cumi-cumi)
Cumik : cumi-cumi
Cumbung : mangkuk
Cungak : menengadah, melihat keatas
Cuping : telinga

D
Dabingi : malam
Dacok/dapok : bisa
Dalih : sambil
Dakhuyyan : durian
Dalom : pangkat, kedudukan, yang disandang kepala adat sebatin
Damakh : getah, batang damar
Dang : jangan
Dapukh/dapokh : dapur
Dawah : siang(waktu sepanjang siang)

Demmon : suka, menyukai, cinta
contoh : sakademmonan=saling menyukai, saling mencintai

Di : 1.sebagai "awalan kata" yang mengandung pertanyaan, contoh: 1a.dikanik=kamu makan? 1b.dipakay=kamu pakai?

2.Di sebagai kata yang berarti kepunyaan, contoh: diq-ku/din-nyak=punyaku/punya saya

Dibbi : sore
Digok : geleng, menggeleng
Dilan : terasi
Dipa : mana
Doh : hilir, meddoh : ke hilir
Duppit : dompet
Duppul : dempul

G
Gagelling : pangkal paha
Galah : leher
Galing : keriting
Galud : berisik
Gambekh : gambir
Ganding : genit

Gawoh : 1.melulu, 2.saja
contoh : 1.way gawaoh=berair, banyak air, air melulu
2.wad-wad gawoh=ada-ada saja
Penjelasan : dalam bahasa Lampung pesisir pada umumnya, untuk kata yang berarti saja, lebih sering(umum) memakai kata khayya/khiya bukan gawoh.

contoh : 1.way khayya=air saja
2.say khayya=satu saja
3.lapah khayya=berjalan saja
meskipun demikian, seandainya tetap ingin menggunakan kata gawoh, itupun tidak disalahkan

Geddang : pepaya
Gellakh : nama
Gellekh/gekhil : sisi, samping
Gellok : toples
Gellong : cacing
Gelluk : segera, buruan, cepat
Gemmul : beruang
Gigi : gusi
Giguk : lutung
Giluh : goyang(gigi) dll
Gimbol : 1.gimbal, 2.berbuah sangat lebat, 3.sedang banyak pekerjaan

Gindang : gendang
Gitoh : getah
Gudu : botol
Gundang : ekor
Guway : berbuat, perbuatan

H
Haba : luapan kekecewaan karena ditinggal pergi(tidak diajak) atau karena gagal mendapatkan sesuatu, yang tidak jarang disertai dengan tangisan

Haban : penyakit, Bahaban : sakit parah

Habang : melayang, terbang(dianalogikan dengan terbang atau punya sayap)
contoh : habang do niku=pergi(terbang) lah kamu

Habu : rehat, istirahat
Habul : samar

Haccak : dimaksudkan
contoh : haccak ji haga mulang=berencana pulang

Haccing : pesing
Haccukh/haccokh : hancur
Haga : 1.ingin, hendak, 2.cinta
Haguk : arah

Hakal : akal, nalar, kecerdasan, berpikir dewasa
contoh : mak buhakal=1.tidak berakal, 2.ediot

Hakha : buah, batang ara

Hakhak : 1.galak, pemarah(wanita), 2.ampuh
contoh : dukun hakhak=dukun ampuh/sakti

Hakham : haram
Hakhuk : yatim

Hakhus : deras(air, gelombang)
contoh : way ni hakhus=sungainya deras

Haku : kataku, maksudku

Halu : temu, menemukan
contoh : 1.ngahalu=menemukan
2.kahaluwan=ditemukan

Halupan : lipan, kelabang
Hama : kutu pada ayam yang sedang mengerami telurnya, dll

Hamu : katamu, maksudmu
Hambokh : terbang
Hambiyang : ikan senangi
Hanaw : enau
Handap/handop : hangat

Hani : katanya(orang ke dua tunggal)
contoh : hani si A=kata si A

Hani tiyan : kata mereka
Hanipi : mimpi, Ngahanipi : bermimpi
Hanja : gertak
Hanjak : gembira, Kehanjaan : luapan kegembiraan
Hantipa : labi-labi
Hantimun : timun suri
Hapa : hampa, kosong tanpa isi
Hapus : bambu apus
Happokh : sarapan

Happong : pelampung untuk berenang, bisa dari kelapa kering, bambu, batang pisang, ban, dll

Hasin : asin, Mahasin : 1.rasa asin, 2.sebutan untuk orang yang mempunyai kemampuan tertentu

Hasok : asap
Hasud : fitnah, Ngahasud : memfitnah
Hattak : batas, perbatasan
Hattu : hantu
Hattuk : bentur, Tahattuk : terbentur/kepentok
Haying : gelisah
Hayu : pagi
Hayum : bayam
Hejjak : hardik
Hellaw : baik, bagus
Hellu : kayu penumbuk(anak) lesung

Henni : pasir
contoh = Bakau Henni (pelabuhan)

Hibus : daun muda/janur Kelapa, Enau dsb
Hihuk : kabut
Hingokh : gaduh
Hinjang : sarung
Hinjik : menjejak/menekan dengan keras
Hippun : berkumpul untuk membahas sesuatu
Hisok : serap (benda cair)
Hisop : hisap
Hiting : peluh, keringat
Holokh/hokhol : ulat
Hotok : otak
Hotong : batu dudukan tiang rumah
Hukhang : udang
Hulu : kepala
Humbak : ombak
Huwi : rotan

I
Icak-icak : berpura-pura
Iccut : pincang(kaki)
Ikat-ikat : ikat kepala pria
Ikok : ikat, Ngikok : mengikat
Ikhung : hidung
Imbun : embun
Ina : induk, ibu
Indik : ikan lele putih
Induh : entah
Ingok/ngingok : ingat

Inggok/enggok : jawaban ketika tidak mau
contoh : mak dinggok=tidak mau

Ingu : ingus
Injing : jinjit, Injing-injing : berjinjit
Injuk : seperti
Ipon : gigi
Ipos : kecoak
Ipus : seka, menyeka, mengelap(ingus/darah/air mata)
Iya : dia

Iyoh : urine/air kencing
- miyoh : pipis/buang air kecil
- miyoh di-apay/miyoh dapay : ngompol
- ngapapiyoh : memeras cucian(pakaian, selimut dll)

Iyos : segar
Iyu : ya
Iyuk : alat bantu peniup api yang terbuat dari bambu

Iwa : ikan
penjelasan : tidak termasuk daging hewan ternak

Iwa way : ikan air tawar(bukan iwa tawakh)
Iwa lawok : ikan laut

Iwa-iwa : serangga pemakan kertas/kutu buku
Iwak : angkat

J
Jaguk : 1.jagoan, 2.ayam jantan
Jahik : jahe
Jajjakh : jajar, berjajar
Jak/anjak : dari
Jakkakh : jangkar
Jakhi : jari
Jakhu : orang yang mempelopori, yang memimpin, ketua
Jakhu jana : biang kerok

Jalang : 1.liar, 2.bertandang
contoh : ngejalang=datang ke tempat orang yang sedang hajatan/pesta adat

Jama : dengan, Jajama/Pujajama : bersama-sama
Jamma : orang
Jambat : jembatan
Jan : tangga, Mata ni jan : anak tangga
Jangguk : jenggot
Jattut : ketus
Jattung : jantung
Jawoh : jauh
Jekhih : miskin, kere
Jekhing : jengkol
Jellaq : turun dari gendongan/pangkuan(balita)
Jimok : lincah, cekatan dalam memanjat pohon
Jimmoh : besok(setelah hari ini)
Jimmoh saway : besok lusa

Juga : acap kali, berulang, berkesinambungan
contoh : labung juga=hujan terus

Jujjul : jolok, menjolok
Juk : beri
Jukuk : rumput
Jukung/Jung : perahu
Jungguk : bangau

K
Kaci/kuyuk : anjing
Kacandat : tertangkap tangan, tertangkap basah
Kaccah : penggorengan, wajan
Kahaga : 1.keinginan, 2.kekasih

Kajjong : 1.suami/istri, 2.kakek/nenek
penjelasan kata kajjong sebagai kakek/nenek :
1.panggilan cucu perempuan terhadap kakek, atau sebaliknya
2.panggilan cucu laki-laki terhadap nenek, atau sebaliknya

Kakak : panggilan kepada saudara perempuan yang lebih tua dari kita

Kakap : 1.ikan kakap, 2.perkosa
- ngakap : memperkosa
- pengakap : tukang perkosa

Kakebbang : kalong
Kakhajja : bekerja
Kakhay : jantan
Kakhita : 1.gurita, 2.kereta api
Kakhussi : kursi
Kakkah : dangkal
Kakkay : membersihkan/membuang sisik dan usus ikan
Kalang : ikan lele
Kalawayan : tidak berdaya, impoten
Kaliccik : jari kelingking
Kalimak/ngalimak : mengharapkan pengertian orang lain
Kalippu : jempol
Kaliyang : daun kering

Kambas : sejenis pare(tumbuh secara alami) yang dimakan daunnya

Kamaman : jenis hubungan persaudaraan, antara kita dengan saudara laki-laki orang tua (kamaman bukan panggilan)

Kaminan : janis hubungan persaudaraan, antara kita dengan saudara perempuan orang tua (kaminan bukan panggilan)

Kamiccak : katak/kodok
Kamukhak : biji buah durian, nangka dll
Kamutik : bakal buah(pentil)
Kanibung : ikan marlyn(sejenis ikan layar)
Kappah : hubungan persaudaraan antar perempuan

Kapakh : potongan-potongan kayu yang terbawa oleh air banjir, dikumpulkan untuk kayu bakar

Kas : 1.lepas, contoh : kas ko=lepaskan
2.bekas, contoh : kas ni api=bekas apa

Kasukh/kasokh : kasur
Katila : ubi jalar/mantang
Katupung : peci/songkok
Kebbad : kain panjang(pakaian wanita)
Kebbaw : kerbau
Kebbok : tutup
Kebbol : kebal
Keccil : peras, Ngeccil : memeras santan dll
Keddok : deras(hujan)
Kejjung : panjang
Kekhkhoh : gigit

Kellakh : cepat, gesit(untuk sesuatu yang bergerak), termasuk kendaraan

Kellam/kellom : gelap
Kenni : 1.beri, 2.izin
Keppah : kerang(sebesar kuku tangan)air tawar
Kibol : buah enau
Kicak : cecak
Kicap : kecap
Kicop : kedip, Makicop : berkedip
Kiccong : 1.kuat(ikatan tali) 2.cepat(perputaran, lari)
Kijul : biji buah duku
Kikim/Hubi : singkong
Killang : kadal
Kipit : ringsek
Kitik : bebek
Kitik assa : angsa
Kitik khanday : belibis
Kitik sekhati : entok
Kolok : lipat
Koloq : kolak
Kombok : singa
Konnyekh : kunyit
Kubak : lecet
Kucay : sejenis bawang berdaun kecil (lalapan)
Kucci : kunci
Kukuk : gempa
Kukkuk : bubur
Kulak : jamur
Kulam : kolam
Kulik : kupas
Kumbang : bunga
kumbut : kain penutup kepala wanita
Kupi : kopi
Kuttay : tenteng, Nguttay : menenteng
Kuwaw : jaling
Kuwol : keong sawah(sejenis keong emas)

Kh : R mati, dibaca ekh
keterangan : 1.kha dalam aksara Lampung
2.kho dalam bahasa Arab

penjelasan ke 1 : KHA dalam aksara Lampung lama kini sudah dihilangkan, aksara tersebut sudah berubah menjadi RA, sedangkan aksara GHA tidak bisa menggantikan aksara KHA, sangat disayangkan keputusan membakukan AKSARA LAMPUNG diambil tanpa melakukan pengkajian mendalam, kalaupun mau menambah huruf/aksara baru seharusnya aksara yang sudah ada tidak dihilangkan, minimal dicarikan aksara pengganti.

penjelasan ke 2 : bagi yang pernah belajar mengaji dan membaca Al qur an, pasti bisa mengucapkan kata kho atau kha

Khabay : takut
Khagah : pria dewasa
Khaggoh : turun
Khajuh : sangat berombak, gelombang pasang
Khajjo : begini
Khakkos : sangat rapat, nyaris tanpa selah
Khakhanggaw : jari tengah
Khalis : lurus
Khamu : ramuan, racikan(ilmu hitam)
Khani : hari
Khang : tempat
Khang laya : badan jalan
Khangok : pintu
Khanggang : renggang

Khanggom : senang akan, gembira akan, suka akan
contoh : 1.Khanggom muwakhi=gembira mendapatkan saudara(baru), seperti ipar atau menantu
2.Khanggom mufakat=suka bermusyawarah, dll
PENJELASAN : selama ini tertulis RAGOM ???

Khapot : rapat(jarak)
Khappa : bagaimana
Khawang : 1.berserakan, 2.banjir
Khawong : lubang, lorong
Khayang : kurus
Khayoh : periuk
Khayya : 1.saja, 2.oya
Khayya-khayya : masih seperti semula
Khayya kinjuk : yaitu, seperti
Khayya kodo : begitukah, benarkah
khebbah : rendah
Khebbu : 1.hari rabu, 2.berbuah lebat
kheddik : dekat
Kheddok : erat

Khellom : dalam(sungai dll), Ngakhellom=semakin parah(penyakit)

Khelloq : tenggelam
Kheppong : kebun buah-buahan
Kheppuk : runtuh(lantai, jembatan, dll)
Khobok : keruh(air)

Khidik : 1.rasa menyengat(gatal dan getir) pada buah terong
2.suara genit, menggoda dari seorang wanita

Khila : rela, ikhlas
Khinok : jinak
Khisok : 1.sering, 2.rapat
contoh : suwal khisok=sisir kutu

L
Labung : hujan
Labung keddok : hujan deras
Laccaw : ikan gabus

Lagi : 1.masih, sedang, 2.segera
contoh : 1.lagi wad kodo=masih adakah
2.lagi mandi=sedang mandi
3.mandi lagi=segeralah/buruan mandi

Laggu : lagu, irama

Lakun : perbuatan yang cenderung buruk(negatif)
contoh : ngalalakun=bertingkah, berulah, iseng

Lalang : tertawa
Lalang waya : bersukaria
Lalangga : sejenis tupai, bulunya berwarna kuning cerah
Lalla-an : tidak cekatan, blo on, begok
Lalak : pedas
Lalakh/lalokh/hakhal : lalat
Lalawah : laba-laba
Lamban : rumah
Lamon/Nayah : banyak
Lamawong : harimau
Lamisong : kaki seribu
Langok : kering, surut
Lapah : 1.berjalan, 2.mari
Lawas : lengkuas
Lawok : laut
Lebbon : hilang
Leggoh : lambat
Leggu : tikus besar
Lemmong : lemang(makanan)
Leppah : lelah
Leppang : mentimun/timun
Leppot : lepat(makanan terbuat dari ketan)
Liggoh : semut rang-rang
Lihay : lidi, lihay kemasi : lidi ijuk batang enau yang berwarna hitam

Lima : angka lima
Liman : gajah
Limau : jeruk
Lindu : kembar
Lindung : belut
Liyang : lubang pada dinding
Liyom : malu
Liyoh : ilalang
Liyud/Liyokh : licin
Lohod : pesan
Lohokh/Luhokh/Luhukh : waktu sholat dzuhur
Luh : air mata
Lukuk : rumput laut
Lukup/Lekkak : terkelupas
Luy : air liur
Luwah : keluar
Luwod : lagi, tambah

M
Mahani : saudara laki-laki
Mahap : ma af
Main : memainkan permainan

Mak : 1.emak/ibu, 2.tak/tidak
contoh : 1.mak ku=ibu saya
2.mak dapok=tidak bisa

Makay : memakai, menggunakan
Maku-an : sering dipetik(sayur mayur)
Makkuk : diam(tidak banyak ulah/gerak)
Makkung : belum

Makhanay : perjaka, bujangan
contoh : ngamakhanay=berperilaku seperti orang bujang

Malih : pergi
Malik : menular

Maling : curi
- ngemaling : mencuri
- pumaling : kleptomania

Mamak : paman (adik laki-laki orang tua)
Mamidokhan : jalan-jalan, bertamasya
Manjaw : berkunjung, bertamu
Mangah : menganga, membuka mulut
Manggang : memanggang
Manggus : manggis
Manuk : ayam
Massa/Ngenna : dapat, mendapat
Mawad : tidak

Mawas : siang(sejak matahari terbit sampai tengah hari/jam 12.00, Semawas : waktu menjelang subuh

Mekhkhu : tangisan yang menjadi-jadi
Mekhkhuh : rontok
Menanah : bernanah

Mengngan : makan(khusus makan nasi)
penjelasan : untuk yang selain nasi menggunakan kata :
1.kanik : makan, kani-an=makanan
2.nganik : memakan, nganik jambu=makan jambu

Messak : 1.matang(sesuatu yang dimasak)
2.masak(buah-buahan)

Mija : meja
Mingan : bisa
Minan : bibi (adik perempuan orang tua)
Minjak : bangun
Minok : menginap
Mikhkhak : ingin, kepingin
Miwang : menangis
Moloh/muloh : kembali
Mundukh/mundokh/mondokh : mundur
Mulang : pulang, mulang pay : pulanglah dulu
Mulli : anak perawan, gadis
Muwakhi : bersaudara

N
Na/ni : nya, contoh: 1.dinni sapa=punya siapa, 2.dinni=punya dia(orang ketiga tunggal), 3.dinni tiyan=punya mereka(jamak)

keterangan:
untuk kata ganti kepunyaan sering juga menggunakan kata "bak" contoh: 1.bak-na/bak-ni=punya dia, 2.bak-na sapa/bak-ni sapa=kepunyaan siapa.

Penjelasan:
untuk membedakan "Bak" sebagai "Ayah" dan "bak" sebagai kata ganti kepunyaan, terletak pada huruf besar dan kecil pada awal kata.

Nabbay : saudara perempuan
Nalam/nalom : pitar, pandai
Nam/nom : angka enam
Nambi : kemarin
Nangun/senangun : memang
Naniyu : tampah Lampung dan Sumbagsel
Nemmon : parah, Bahaban nemmon=sakit parah
Ngagettas : menuwai padi, panen padi
Ngalammau : terapung
Ngalangok : memanen kolam/tambak (ikan/udang)
Ngalas : menerobos semak-semak/hutan
Ngalasuh : mencuci beras

Ngeddok : punya, ada
contoh : 1.jamma ngeddok=orang berada/kaya
2.mak ngeddok=tidak punya/tidak ada

Ngingi : sebutan umum untuk sesuatu yang tidak panas/hangat lagi
contoh :
-Mi ngingi=nasi dingin
-Ti ngingi koppay=dinginkan dulu/tunggu sampai dingin
-Kangingiyan=situasi dimana seseorang tidak merasakan kehangatan dari siapapun, karena sedang sendirian

Ngison : dingin(suhu), kangisonan : kedinginan
Nuha/Ngemukhak : sok, angkuh, jual mahal
Numan/mammis : air nira
Nunas : tumbuh tunas
Nyangu/kekhing : kering
Nyawan : bahan anyaman dari bambu
Nyiwan : lebah madu
Nyonnyong : kumbang(yang membuat lubang di) rumah
Nyuccun : membawa(sesuatu) beban diatas kepala

Nyuhun : Membawa sesuatu seperti membawa tas punggung(Ransel dll), atau seperti membawa bekhunang(keranjang tradisional), atau bisa juga menyandarkan/menggantungkan bawaan ke punggung yang di masukkan ke dalam suatu tempat/wadah yang memiliki tali,seperti jayik sekhaddang, lalu tali dari wadah tersebut diletakkan/digantungkan pada dahi/jidad.

Nyuwoh : benci

O
Odo/udo : panggilan untuk kakak laki-laki tertua
Odo ngah/odo tengah : panggilan untuk kakak laki-laki ke dua
Odok : pungut
Olok : ceruk, tikungan pada sungai yang dasarnya dalam
Olok mulang : arus berputar pada ceruk
Ondom/undam : tempurung, batok
Osekh : usir

P
Pacakh : inai, bupacakh : berinai
Paccah : penggal
Padah : akibat
Pagun : masih
Pagoh : pendiam
Pah : yuk, mari
Pahik : pahit
Pak : angka empat
Pakay : 1.wadah, 2.untuk

Pamennah : barang yang dipersiapkan sejak lama, sebagai hadiah/pemberian kepada seseorang, hal ini biasanya terjadi pada calon mertua perempuan kepada calon menantu wanita

Paku : 1.paku(baja), 2.tumbuhan pakis dan sejenisnya
Panday : bisa, mampu
Panduyu : galah, penjolok(batang bambu)
Pangayuh : dayung
Panjak : jelas
Panjang : piring
Panunjuk : jari terlunjuk
Papah : alas

Papah iyoh : terpal, plastik, karpet alas tidur bayi, agar air kencingnya tidak kemana-mana

Pakkalan/pakkalan mandi : pemandian umun di sungai
Pakhi : padi
Pakhiya : pare

Pasanggikhi : suatu sikap(pengertian) dimana seseorang mengukur perasaan orang lain, dengan perasaan dirinya sendiri, sehingga dalam pergaulan sehari-hari tidak pernah merasa derajatnya lebih tinggi dari orang lain, dan tidak pernah menganggap urusannya lebih penting dari urusan orang lain

Patak : burung kutilang
Pati : santan
Patoh : patah
Paya : rawa
Payah : susah
Peccoh : pecah
Pekkon : desa
Pekhkhos : 1.rasa masam, 2.asam sebagai bumbu dapur
Pekhkhos hasin : sayur masam
Pekhkhit : burung pipit
Pellok : potong, mellok : memotong
Pennah : tunggu, Mennah : menunggu/menanti
Penyawa : tutur kata
Plisi : polisi
Pikha : berapa, Papikha : beberapa

Pi-il : perasaan tidak puas atas sikap atau layanan seseorang/kelompok masyarakat terhadap kita, di mana kita merasa diremehkan, disepelekan, atau bahkan merasa tidak dihargai.
penjelasan : pi il kemudian diartikan sebagai harga diri

Picung : peang
Pikoh : pelintir, Mikoh : memelintir(leher)
Pinja : perangkap
Pinyuk : penyok
Pippih : pipih
Pisil : pensil
Pisol/Misol : menangkap ikan dengan tangan kosong
Pitit : cubit
Pitu : angka tujuh
Piyu : selimut

Poppoh : cuci(pakaian)
- poppohan : cucian
- moppoh : sedang mencuci pakaian

Posokh : 1.pusat, puser, udel, 2.pusaran air

Pu : awalan kata yang menerangkan situasi atau keadaan,

contoh: 1.pujajama=bersama-sama, 2.pujama=bersama, 3.pubalaq=berukuran besar-besar

keterangan: jadi yang tepat adalah "pujama" bukan "bejama"

Puwakhi : saudara, Muwakhi : bersaudara
Puwakhi sekellik isaw : saudara kandung
Puluh : angka sepuluh
Pumatang : bukit, gunung

Pun : 1.yang Mulia atau Tuan, 2.panggilan(orang yang lebih muda) kepada anak Dalom (kepala adat saibatin), 3.panggilan penghormatan kepada seseorang(tunggal) atau beberapa orang(jamak) pada saat mengikuti/menghadiri acara tertentu.

Pungah : sombong
Puput : tamat
Pudak : muka, wajah
Putil : memetik(buah/bunga)
Putuk : putus
Puttak : mematahkan pucuk tanaman
Putti : pisang
Puttiyanak : kuntilanak
Puttung : puntung
Puttut : pantat

S
Sabah : sawah
Sabay : besan
Sabellik : licik, curang
Sabuk : ijuk(enau) dll
Saka : 1.dulu, 2.lama

Sakik : 1.rasa sakit, 2.miskin
contoh : 1.sakik baccong/nihan=sakit sekali
2.jamma sakik=orang miskin

Sakuk : tersinggung
Sakhak : sobek
Sakhan : sedang ditinggal kepala keluarga(suami) bepergian
Sakhung : sarung pisau, dan sebagainya
Salossokan : isak, terisak, menangis
Sambol : sambal
Sambol dilan : sambal terasi
Sambol gukhing : sambal yang digoreng
Sanak : anak-anak
Sapida : sepedah
Sassak : 1.pelik, 2.parah

Say : 1.angka satu, 2.yang
contoh : 1.akuk say=ambil satu
2.sapa say ngakuk ni=siapa yang mengambil

Sayak : sayat

Saibatin/Sa-ibatin : sebutan untuk seseorang beserta keluarganya, yang memangku/berkedudukan sebagai kepala adat

Sebbat : cambuk
Sebbak/Nyebbak : mengambil(memproses hingga keluar)air nira
Sebbik : sedih, gundah
Segala : macam, ragam
Seggok : sembunyi
Seggung : tinju, jotos
Sekhkhay : serai
Sekhkhok : jarum
Sekhkhuk ; jahit
Sekhkhom : semut
Sekhkhom sakik : semut merah/semut api
Sellop : sandal
Seppok : cari, Nyeppok : mencari
Siding : jerat
Sigi : bunga/bakal buah tangkil
Sigokh : mahkota penganti wanita
Sikap/sikop : cantik
Sikkapan : jendela
Sikkuh : sungkan, tidak leluasa, kikuk
Sikhi : segan(disertai dengan rasa hormat/takut)
Silaw : 1.silau(terkena pantulan sinar) 2.jenguk, Nyilaw : menjenguk

Siput : sejenis keong yang hidup di air payau/muara sungai, berwarna hitam dan berbentuk bulat panjang, meruncing dibagian ekor

Siwa : 1. angka sembilan, 2.sewa
Siwaq/tiwakh : putus, pisah(hubungan kasih/pacaran/persaudaraan)
Siwok : ketan
Siyah : bisik

Sasiyahan : 1.berbisik-bisik, 2.salah satu tradisi mulli makhanai yang dilakukan pada malam hari seperti berkenalan, merajut kasih, merencanakan masa depan, dengan suara pelan/berbisik, uniknya mulli tetap di dalam kamarnya, sementara sang makhanay berada diluar rumah tepat disamping atau di bawah kamar si mulli.

Siyang : cerai, bercerai

Siyoh : siput berbentuk bulat atau meruncing(pendek) yang hidup di sungai berbatu atau menempel di pepohonan rawa payau, nipah dan batu karang(laut)

Sokhok : enggan, antara mau dan tidak
Sudu/sussud : sendok

Suhu/dudu : panggilan khusus dalam hutan, dengan meneriakkan kata hu, atau meneriaki orang yang di anggap lucu atau berbuat salah

Sumbuk : anyaman bambu(sejenis besek) namun berukuran lebih besar dan sedang

Sumbuk panglasuh : sumbuk khusus untuk mencuci beras
jenis lain : 1.bayuk=tempat nasi namun berbingkai seperti bakul
2.sab=sumbuk berukuran sangat besar, bisa memuat puluhan kilogram gabah

Sumukh/sumokh/somokh : sumur
Suwa : lauk

Suwak : 1.rawa pasang surut/rawa air payau
2.pohon yang tumbang dengan akar-akarnya

Suwal : sisir
Suwala : teripang/timun laut

Suya : kecewa, menyesalkan
contoh : suya kik mak dikenni panday=kecewa jika tak kau beri tau

T
Tabik : permisi, numpang lewat
Tabitta : teringat, terkenang
Taboh : 1.gurih(rasa) 2.lemak
Tabu : tawon, Tabuwan : banyak(jenis) tawonnya
Taduk : jantung pisang
Tagak : jidat
Tagagguk : terbentur(kepala)
Tagu : sapa, Nagu : menyapa

Tahok : 1.jelek(tidak bermutu)
2.buruk(perangai/perilaku)

Tahumbak : terjatuh
Takanjat : terkejut
Takhajang : terjang
Takhu : berhenti
Takhuppat : tersadung
Takkay : tangkai
Takkil : tangkil
Talos : talas
Talluy : telur
Tambuh/Nambuh : menambah nasi pada saat makan

Tamong : 1. panggilan cucu laki-laki kepada kakek atau sebaliknya
2. panggilan cucu perempuan kepada nenek atau sebaliknya

Tandang : pergi(mencari)
contoh : 1. tandang gagulayyan=mencari sayuran ke kebun/hutan
2. tandang midang=mencari pengalaman, merantau

Tanoh : tanah
Tanom : tanam
Tanno : sekarang
Tanggay : kuku
Tapaq : telapak
Tapi/penapi : tampah
Tattu : tentu
Tapay : tape
Taw : 1. maja, 2.labu kuning(bahan kolak)
Tayakh : lempar, Nayakh : melempar
Tayokh : jijik, menjijikkan
Tebbak/Nebbak : melintang
Tedduh : tebak, duga
Teggak/Neggak : mendirikan bangunan

Teggi : tegak, curam
contoh : 1. teggi khani=tengah hari, ketika mata hari diatas kepala
2. temeggi=berdiri seperti patung, berdiri terpaku
3. mati temeggi=mati berdiri(seperi bambu/kayu)
4. batu teggi=batu berdiri, tonggak batu, berdinding batu, bebatuan curam
5. teggi nonnong=tebing curam, jurang dalam, pencakar langit

Tellu : angka tiga
Tennay : perut

Ti : 1.awalan kata yang mengandung unsur perintah, contoh: tikanik=ayo dimakan! kata "tikanik" mempunyai padanan kata "kanik" saja atau "kanik do" yang berarti "makanlah!"

2.Ti sebagai awalan kata yang mengandung unsur pertanyaan, apa bila kata yang mendapat awalan "Ti" diikuti kata "kodo" ataw "yu"

contoh: tikanik kodo=dimakan kah/memangnya dimakan?, tikanik yu=dimakan ya?

Tigal : kelelawar, kampret
Tikacay : terlepas tanpa disadari/tidak disengaja karena lalai
Tikambang/pukakambang : terkatung-katung
Tiku : teko
Tikhah : sisa
Tikham : rindu
Tikhom : tiram
Tilah : jelas
Tinjuk : tangkap, Ninjuk : menangkap
Tittok : tercecer
Tiwat : menyambar, mengambil secepat mungkin
Tiyung : terong
Tohot/Tuhot : sisa pangkal batang setelah ditebang
Tok ko 1. buang, 2. tak perlu/tak usah
Tok ko dano : tak usah ya
Tokh/Mettokh : manis(rasa)

Tudung : payung
- tudung tuguk : caping
- tudung saji : penutup hidangan

Tuha : tua

Tukhun : 1.turun, 2.lihat khaggoh
keterangan : untuk manyatakan turun harga, turun pangkat, turun jabatan, maka yang dipakai adalah kata tukhun, bukan khaggoh.

Tukkul : ikan tongkol
Tulah/Tulahn : kualat
Tumbay : sudah lama sekali, dahulu kala

Tunay/Matunay : cepat selesai, cepat sampai, cepat berbunga/berbuah

Tuwoh : tumbuh
Tuwot : lutut

U
Udi/odo : itu, Huddi/hoddo : yang itu
Ulah : perbuatan
contoh : khappa ulah khayya ulih=setiap perbuatan akan menuai hasil

Ulay : ular
contoh : 1. ulay sawa=phyton
2. ulay si=kadut
3. ulay lehhuk=kobra

Ulih : 1.karena, 2.pendapatan, perolehan, hasil
contoh : 1. ulih api=karena apa
2. dipa ulih mu=mana perolehan/hasil kamu

Unduh/Ngunduh : memetik dalam jumlah banyak(buah-buahan)

Upi : bayi
Upik/Opek : bayi perempuan yang belum punya nama
Uppan : umpan
Uppu : cucu
Uttung : untung
Uyah : garam

Uyah lalak : campuran cabai dan garam yang digerus halus(sambal kering)

Uyah dilan/Uyah duppul : uyah lalak ditambah terasi, kegunaanya sama yakni sebagai sambal kering ketika tidak ada rampai, tomat, belimbing jari, jeruk masam dan bahan saus lainya, kecuali pepaya, karena pepaya tidak memiliki rasa masam.

W
Walu : angka delapan
Watekh : cemas, khawatir
Wakhahan : dongeng, Wawakhahan : mendongeng
Wawwah : terang

Way : 1. air, 2. sungai
contoh : 1. way tokh=air manis
2. way semaka=sungai semaka

Waya : ramah
Waya nihan : ramah sekali
Wo/Uwo : panggilan untuk saudara perempuan tertua

Wo ngah/Wo tengah : panggilan untuk saudara perempuan tertua ke dua